volumen xxiii. - Archive ouverte UNIGE

747 SERMONS. 748
c'est qu'Abraham a esté contraint de tuer son fils
voire son propre fils unique. Or ceci outrepasse
tout ce qui seroit possible d'imaginer d'obéissance,
qu'un homme fidèle seroit prest de rendre à Dieu,
nous devons estre siens et à vivre, et à mourir:
mais ce qui est ici commandé à Abraham, est
beaucoup plus. Car il n'est pas question seulement
qu'Abraham se renge du tout à [pag. 228] Dieu,
renonçant à soy-mesme, et que lo fils qui luy a
esté donné luy soit osté, et qu'il le quitte, comme
quand il plairoit à Dieu de le retirer qu'il portast
cela patiemment: il n'est pas question de cela, mais
il faut que luy mesme le tue. Voila une chose si
dure et si estrange que nous n'en pouvons pas ouir
parler, que nous n'en soyons comme esperdus. Ce
n'est point donc sans cause, que Moyse depuis le
chapitre neufieme, après qu'il a raconté ci dessus
de la vie d'Abraham, met cest acte en avant, et
dit qu'après ces choses Dieu l'a encores tenté. Or
il avoit eu une tentation bien grande, quand Dieu
l'arracha de la maison de son père: et mesmes les
mots l'emportent, quand il dit: Sors de la maison
de ton père: et de tout ton parentage, et du lieu
de ta naissance, et puis, où est-ce qu'il trouvera
meilleure habitation? Vien, dit-il, en un pays
incognu, comme un povre aveugle qui a les yeux
fermez. Voila le pays où ie te veux mener, voire
mais il ne luy est pas cognu: il faut donc qu'il soit
là comme iettant la plume au vent, ne sachant de
quel costé se tourner. Voila, di-ie, une grieve
tentation à Abraham, quand il faut qu'il suyve là
où Dieu l'appelle, ne sachant toutesfois où il va, et
neantmoins c'est comme son Abc. Car voila par
où Dieu commence quand il veut enseigner en son
escole. Mais est-il entré [pag. 229] en la terre?
nous voyons comme la famine l'en chasse, et comme
la femme luy est ravie. Et pour la seconde fois
mesmes, nous voyons qu'il est tormenté çà et là,
qu'il n'a point de repos: il n'y a celuy qui ne se
dresse contre luy, et luy endure toutes ces choses.
Et cependant il ne murmure point contre Dieu, il
ne se décourage point pour tous les troubles qui
luy sont dressez, ni pour nulles afflictions qu'il
endure: comme ceux qui sont tant délicats, que si
Dieu ne les traitte à leur guise ils plaquent là tout,
et ne veulent plus savoir que c'est de luy obéir.
Or combien qu'Abraham fust ainsi traitté rudement,
si ne laisse-il pas de continuer en un mesme train:
mais après toutes ces choses, et combien est-ce
qu'il endure? Ce n'est point seulement pour trois
ou quatre ans, mais il est tellement agité, que
quand il a passé vingt et trente et quarante ans
en ceste terre, c'est tousiours à recommencer et pis
que devant, iusques à ce qu'il est contraint mesmes
de quitter l'amour de son fils aisné et de s'en despouiller,
qui estoit desia comme une espèce de mort.
Apres il y avoit ces tentations grandes, Que Dieu
luy avoit promis de luy donner la terre: et cependant
on le chassoit comme s'il n'eust pas esté digne
d'arrester son pié en lieu qui fust. Dieu luy avoit
promis semence: voire mais il vient iusques en
[pag. 230] l'aage de quatre vingts ans, et sa femme
est sterile, en sorte qu'il sembloit que ce fust une
mocquerie de toute ceste promesse. Est-il venu en
l'aage de cent ans? il a Isaac. Voire mais il faut
qu'il chasse et bannisse Ismael, comme nous avons
veu. Si nous pouvions bien gouster ces tentations-la
il est certain que ce seroit pour nous ravir en
estonnement, de ce qu'Abraham a eu une telle
vertu, et telle constance de foy de batailler contre
tels assauts, et tousiours les surmonter. Or donc
quand il est dit: Apres ces choses: c'est pour
monstrer que Dieu nous a voulu donner en la personne
d'Abraham un miroir tel, que quand nous
aurons à combattre, il ne nous face point mal de
suivre ses pas, et que nous ne trouvions point
estrange ou nouveau d'estre conformez à celuy qui
est père de toute l'Eglise. Mais encores il est
certain, que quand chacun regardera bien à toutes
les tentations qu'il a à souffrir, ce n'est pas la
centième partie de ce que nous voyons en Abraham.
Ainsi notons, que selon que Dieu luy avoit eslargi
de son Esprit, aussi il a voulu esprouver sa foy.
Car il ne faut pas que les dons de Dieu soyent
oisifs ni inutiles en nous: mais il traitte chacun
selon sa mesure. Car il nous prepare à endurer,
autrement nous ne saurions pas subsister: nous ne
saurions aussi remuer un doigt pour bien faire
[pag. 231], que nostre Seigneur ne nous dispose, et
qu'il nous en donne la vertu. Quand donc il nous
met en combat, il employe les graces de son sainct
Esprit. Or d'autant qu'Abram a eu une grande
perfection au prix de nous, selon que les hommes
la peuvent avoir, voila pourquoy aussi Dieu l'a
esprouvé de façons si estranges et desquelles nous
n'approchons pas à beaucoup près: mais tant moins
avons nous d'excuse de nostre paresse, froidure et
lascheté, si pour le moins nous ne suivons nostre
père Abraham: et si nous ne pouvons pas avoir
une constance et foy égale à celle qui a esté en
luy, si nous ne taschons de le suivre de loin, selon
nostre portée et infirmité, il est certain que nous
serons plus qu'inexcusables. Ainsi donc, nous avons
à recueillir de ce passage, qu'Abraham tout le temps
de sa vie a esté tormenté en corps et en esprit: et
quand c'est venu à la fin Dieu l'a encores voulu
esprouver plus vivement sans comparaison que
iamais, en sorte que c'eust esté pour le faire désespérer
cent mille fois, s'il n'eust esté conformé d'une façon
admirable par le S. Esprit. Or cela nous est-il
recité d'Abraham? ce n'est pas à fin que nous
ayons simplement sa vertu en admiration, pour