volumen xxiii. - Archive ouverte UNIGE

775 SERMONS. 776
serions esmeus que pour l'authorité qu'il a par
dessus nous. Et cela ne seroit que fumee. Mais
quand nous l'aimons, son service nous est quant et
quant amiable. Car David ne dit pas seulement
que la Loy de Dieu luy a esté précieuse plus que
l'or et l'argent: mais aussi qu'elle luy a esté douce
comme miel. Ainsi donc, au lieu que nous sommes
adonnez à nos plaisirs et volnptez, et que les cupiditez
de nostre chair nous abrutissent, et nous transportent
tellement, et nous allèchent, que nous ne
demandons sinon d'embrasser les vanitez qui se proposent:
au lieu donc que de nature nous sommes
enclins à cela, Dieu nous veut changer: c'est à
dire, qu'au lieu que nos concupiscences nous attirent
çà et là, que nous ayons ceste affection qui
surmonte, c'est assavoir, que nous prenions plus de
plaisir de nous addonner à luy, et que nous soyons
gouvernez par son sainct Esprit, pour nous conformer
à sa iustice. Que. donc nous prenions plus
de plaisir [pag. 289] à cela qu'en toutes nos voluptez
meschantes et corrompues. Au reste, l'amour
de Dieu ne peut estre sans reverence. Nous ne
l'aimons pas comme nostre inférieur, et comme
nostre compagnon et pareil: mais comme nostre
Père. Et voila aussi pourquoy il dit par son Prophète:
Si ie suis vostre Père, où est l'amour que
vous me portez? Notamment il attribue ce nom
d'Amour au Père. Or il met aussi quant et quant le
mot de Maistre : mais sur tout il se nomme Père, et non
sans cause. Car si nous ne cognoissons Dieu seulement
que comme nostre supérieur, il est certain que,
nous serons bien esmeus de nous assuiettir à luy:
mais comme i'ay desia dit, ce sera une crainte servile.
Or le principal est que nous le tenions pour
nostre Père, et que nous soyons comme ravis de
nous conformer à sa volonté, puis qu'il luy a pieu
de nous adopter pour ses enfans. De là donc procede
ceste reverence volontaire. Et voila comme
nos coeurs seront distraits de toutes ces vanitez
ausquelles ils sont enclins, iusques à ce que Dieu
les dédie à soy. Ainsi notons bien que pour
approuver nostre vie à Dieu, et pour estre bien
reiglez, il ne faut point seulement que nous facions
ce qu'il nous commande: mais que nous desirions
aussi de le faire, et que nous captivions toutes nos
passions [pag. 290] et cupiditez, qui resistent à ce
que nous ne soyons attirez à Dieu pour estre conioints
à luy et à sa iustice, et pour y adherer.
C'est encores ce que nous avons à retenir sur ce
mot d'Amour. Or il adiouste, rendant la raison
pourquoy il a cognu qu'Abraham l'aimoit. D'autant,
dit-il, que tu n'as point espargné ton fils unique.
Or voici la touche à laquelle il nous faut venir,
pour savoir si nous aimons Dieu, ou non. Vray
est que chacun se fera accroire que rien ne luy défaut:
mais cependant nous ne sommes pas iuges
competans en nostre cause. Il faut donc, que le
tout viene à l'apparence de Dieu, et à son bureau.
Or il est dit notamment, que quand nous n'aurons
rien espargné pour l'amour de Dieu, qu'alors nous
aurons tesmoignage certain et infalible, que nous
l'aimons. Au contraire si nous espargnons rien
quand il sera question de son service, voila nostre
hypocrisie qui est descouverte, où au paravant on
ne l'avoit point cognue, et n'en pouvoit-on point
iuger aussi. Brief, tout ainsi que la perfection des
Chrestiens c'est d'adhérer à Dieu d'une volonté
franche: aussi le second doit estre conioint, c'est
assavoir, que pour aimer Dieu nous soyons prests
de tout quitter, voire quelque desirable qu'il soit.
Et que nous apprenions de préférer son honneur à
toutes [pag. 291] choses les plus précieuses que nous
ayons, iusques à n'espargner ne père, ne mere, ni
femme, ni enfans, ni nos vies propres. C'est donc
ce que nous avons à méditer tout le temps de
nostre vie, quand nous voudrons savoir et nous
bien enquérir si nous avons profité en la crainte
de Dieu et en son amour, que nous regardions:
Or çà, tu es addonné à tes biens, tu appetes trop
les honneurs. Qu'un homme viene-là, et qu'il
entre en conte avec soy-mesme sans feintise. S'il
te falloit renoncer à tous les honneurs du monde
que tu fusses vilipendé, qu'on te crachast au visage,
et que cela fust requis pour l'honneur de Dieu,
comment le porterois-tu? Si cest homme-la trouve,
Helas, ie ne sauroye: s'il se sent encores empesché
tant de son ambition, qu'il ne puisse pas estre là
comme couché tout plat, quand il plaira ainsi à
Dieu, ô il est certain qu'encores n'est-il pas venu
là où il falloit. Qu'il s'efforce donc et qu'il marche
plus outre. L'autre aussi qui aura des biens et des
possessions, qui aura train de marchandise, qu'il
regarde: Or çà, s'il falloit que tu fusses appovri,
que seroit-ce? Si Dieu vouloit pour la gloire de
son nom que tu n'eusses pas du pain à manger,
que ferois-tu? Si un homme trouve: O il me seroit
impossible de cela, i'aimerbye mieux cent fois
mourir que d'endurer [pag. 292] telle disette: qu'il
pense, Helas, ie suis encores bien eslongné de Dieu:
il faut donc m'efforcer mieux que iamais. Autant
en est-il de toutes les autres povretez. S'il falloit
que l'un quitast son pays, l'autre femme et enfans.
et qu'il ne peust arracher cela de soy-mesme, qu'il
•n'y eust de grands bouillons, qui l'empeschassent de
se renger: qu'il cognoisse: Or çà, ie cuidoye estre
bien obéissant à Dieu: mais ie l'ay cuidé tant seulement,
ce n'a esté qu'une imagination vaine d'où
i'estoye deceu. Il faut donc que ie me despouille
de ces passions, et que ie commence de renoncer à
moy et à tout ce que i'aime, et que Dieu cognoisse
que ie suis addonné à luy, et qu'il approuve mon
service. Voila donc, ce que nous avons à retenir