Lizardiren poetika pizkundearen ingurumariaren argitan - Euskara

Hitzaurrea
1981ean Euskal filologiako lizentziatura amaitzean, Eusko Jaurlaritzaren
Kultura Sailaren beka baten laguntzaz tesina egiteko proiektua aurkeztu nuen
Lizardiren “Biotz begietan” liburuaren azterketa formala egiteko: egile honek
poesian buruturiko berrikuntza-lanaren alde linguistiko eta semantikoak xeheki
deskribatzeko eta interpretatzeko asmoz, hizkuntzalaritzaren laguntzaz.
Bestalde, demokraziaren etorrerarekin batean euskal liburutegi eta
hemeroteketan lehen aldiz eskuratu ahal izan ziren guda aurreko hainbat
dokumentu: egunkari, aldizkari, artxibo pertsonalak... Zehazki arakatze-lan
luzeak egin nituen Lizardiren prentsa lanen arrastoa berreskuratzeko asmoz.
Uste baino uzta oparoagoa aurkitu nuen, izan ere, bere artikulu hoberenen
antologia zen “Itz-lauz” (1934) liburuaren bidez ezagutzen zirenez gain, beste
laurogei inguru prentsa-lan bildu bainituen, euskarazko eta gaztelaniazkoen
artean. Gisa berean, Lizardiren poema ezezagun zenbait ere aurkitu nituen
prentsa argitalpen horietan sakabanatuak, Euzkadi eta El dia egunkarietan,
zehazki. Ondorioz, horien bidez Lizardiren ideia poetikoen ikuspegi berria
eskuratu zitekeelakoan, Lizardiren artikuluen edizio bat prestatu nuen 1988an
Xabier Lizardiren kazetari lanak.
Aipaturiko material horietan oinarriturikoa da doktoradutza lana. 1993an
aurkeztu nuen Euskal Literatura arloan Deustuko Unibertsitatean, “Lizardiren
poetika Pizkundearen ingurumariaren argitan”. Tesia Juan Mari Lekuonaren
zuzendaritzapean burutu nuen, Deustuko Unibertsitatean. Ondoren, Xabier
Lizardiri buruzko zenbait liburu, saiakera eta artikulu argitaratu ditut, bai eta
guda-aurreko Pizkunde mugimenduaz eta bereziki Orixe eta Aitzoli buruz.
Hazken hamarkada honetan gure garaiko euskal idazle batzuei buruzko
azterketa-lanak argitaratzen dihardut, gehienbat olerkiaren arloan; besteak
beste, Jon Mirande, Joseba Sarrionandia, Xabier Lete eta Bernardo Atxagari
buruzko iruzkinak eta azterlanak eman ditut argitara eta zenbait ikuspegi orokor
ere bai.
ARGITARATURIKO LIBURUAK
OTAEGI, L., XABIER LIZARDIREN KAZETARI-LANAK, Erein, Donostia, 1988, 423 or.
OTAEGI, L., LIZARDIREN POETIKA, Erein, Donostia, 1994, 278 or
OTAEGI, L., XABIER LIZARDI. EUSKERA ANDIKI-SOÑEKOZ, Euskal Editoreen
Elkartea. Klasikoak Bilduma, 1995, 222 or.
OTAEGI, L., GERBAULT BAKARTIA, Erein (Donostia), 1996, 53 or.
OTAEGI, L., JOSE ARIZTIMUÑO “AITZOL”, Eusko Jaurlaritza . Bidegileak Bilduma,
1998, 20 or.
OTAEGI, L., “BERNARDO ATXAGA. EGILEAREN HITZA”, Labayru Ikastegia.BBK,
1999, 71 or.