isahluko 1 - UKZN ResearchSpace - University of KwaZulu-Natal

2.4.3 I-LOOK AND SAY METHOD
Le ndlela isukela enjulalwazini okuthiwa yi-Gestalt, egxila kokuphelele kunokuba igxile
ezingxenyeni zokuphelele. Yaziwa kakhulu ngokuthi yi-global method. Iyindlela e-
analytical ngoba igxila kokuphelele bese ihlaziya izingxenye zalokho (Joubert et al,
2008, p. 91). Ngokwe Gestalt theory, izingxenye zokuphelele zakha okuphelele, okuyi-
Gestalt. Le gestalt yilokho umuntu ahlangabezana nakho ekuqaleni ( Jordaan & Jordaan,
2000, p. 16). ULevy (2009) ubeka ukuthi i-look and say method ibuye yaziwe ngokuthi
yi-look and see noma yi-Whole Language Approach.
Ngokwakhe uLevy, ngale ndlela ye-look-and-say ingane ifunda igama eliphelele lapho
ilithi nhla, kunokuba ifunde uhlamvu nohlamvu lwegama noma lwemisindo. Ukufundisa
igama eliphelele, uthisha usebenzisa amagama asikiwe (flash cards) nezithombe ukumela
igama elithile. Uthisha angabiza igama aliphimise enzele ingane kunokuba kube yiyo
ingane esho lelo gama isholo yena, bese uthisha ecela ingane ukuba ilibhale lelo gama.
Ngaleyo ndlela lokhu kulekelela ekutheni kwande isibalo samagama ingane ekwazi
ukuwahlonza nokuwaqonda, okusiza ekutheni ingane ikwazi ukulibona lelo gama. Imisho
esikiwe (sentence strips) iyasetshenziswa ukufunda imisho. Amagama ayasikwa, igama
negama elisemushweni lizihambele lodwa, bese umusho uphinde wakhiwe kabusha,
umiswe ngezindlela ezahlukene. Ekugcineni, uthisha uxoxa indaba. Amagama akha
indaba asuke ekhona emishweni esikiwe. Abafundi basebenzisa imisho esikiwe ukwakha
indaba. Imisho iyabhidlizwa, abafundi bazakhele eyabo imisho ngawo.
Njengoba kungekho soka elingenasici, le ndlela nayo bayayigxeka abanye abacwaningi
ngokuthi ayizinikezi izingane amathuluzi okukwazi ukuziphimisela zona ngokwazo
amagama. Ngale ndlela, ingane ifunda ngekhanda kunokuba ifunde ukuthi izinhlamvu
nemisindo kusebenza kanjani ndawonye ukwakha amagama aphelele. Yingakho-nje
abanye abacwaningi bekholelwa ukuthi ukusebenzisa le ndlela ngokuyihlanganisa
nendlela yokufundisa imisindo, kungasiza izingane ekufundeni amagama alukhuni.
73