isahluko 1 - UKZN ResearchSpace - University of KwaZulu-Natal

ongumhlanganyeli wocwaningo bavumelane ngezinto ezithile mayelana nokuchaza
ngesimo leso kumbe izehlakalo eziphathelene naso; ocwaningwayo akwazi ukuzichaza
(Orgill, 2002; Bernard, 1999).
UBogdan benoBiklen (1992, p.135) bachaza inhlololwazi njengengxoxo esuke ihleliwe,
imvamisa nomuntu oyedwa, nabantu ababili noma ngaphezulu, ngesizathu sokuthola
ulwazi oluthile. Kusobala ukuthi umcwaningi ubuka izinto ngehlo lalowo asuke
emcwaninga, akaqhamuki nokwakhe kumbe ezakhe izimpendulo. Ngale ndlela
umcwaningi wabe esebona ukuthi indlela yenhlololwazi yayilufanela lolu cwaningo
njengoba naye wayefuna ukuthola ulwazi kothisha mayelana nokufundiswa kokufunda
okubhaliwe olimini lwasekhaya lwesiZulu, njengoba kuyibona abafundisa izingane.
3.3.1 INHLOLOLWAZI ESAKUHLELEKA (SEMI STRUCTURED INTERVIEW)
Inhlobo yenhlololwazi eyasetshenziswa kubo bonke abacwaningwayo; okungothisha
abayisishiyagalombili basezikoleni ezimbili zaseMlazi, iMbalenhle neGolide, kwaba
yinhlololwazi esakuhleleka (semi-structured interview). Inhlololwazi esakuhleleka ibuye
ibizwe ngenhlololwazi eqondisiwe (guided interview) ngoba umcwaningi ulungisa
iziqondisi zenhlololwazi (interview guides) ezinemibuzo azoyibuza (Flick, 1998).
Imigomo noma imigudu emisiwe yiyona evumela umcwaningi ukuba akwazi ukwenza
imibuzo ukuze kugqame kahle noma kubonakale okuyizona zindawo ezidingeka zibe
nezimpendulo zemibuzo yocwaningo (Flick, 1998, p.76).
Kwenziwa uhlelo lwemibuzo noma isheduli yenhlololwazi esakuhleleka (semi-structured
interview schedule) ngemibuzo okuyiyona engangizoyibuza kwabacwaningwayo. UDe
Vos nabanye (2002) bachaza isheduli yenhlololwazi njengemibuzwana esuke
ilungiselelwe ukuqondisa noma ukuhola inhlololwazi. Lokhu kwenza ukuba umcwaningi
akwazi ukulungisa imibuzo evulekile azoyibuza kulowo azothola kuye ulwazi baphinde
baxoxe ngayo (Holstein noGubrium, 1995, p.76). Lokhu ngakwenza ukuze ngiqinisekise
ukuthi ngangizoyibuza yonke imibuzo eyayidinga ukuphendulwa kulolu cwaningo.
98