isahluko 1 - UKZN ResearchSpace - University of KwaZulu-Natal

Uthisha waveza ukuthi uye anike abafundi izincwadi zezindaba ezahlukene, kube
nezabafunda ngesivinini ezinye kube ngezalabo abanesivinini esincane. Ubahlukanisa
ngokwamaqembu, abafunda ngesivinini banikwe indaba eyehlukile kweyalabo abafunda
kancane. Lokhu uthisha uye akwenze ngokuthi angaze abanika incazelo yokuthi kungani
izindaba abazifundayo zingafani ngoba labo abafunda kanzima bangaphatheka kabi
ukuthi bona banikwe indaba elula ngenxa yokuthi basalele emumva ngokufunda
kunabanye; bese lokhu kuqeda ukuzethemba kanye nelukuluku lokufunda kulabo
bafundi. Lapho sebehambile abanye sekuphume isikole kumabanga aphansi, uthisha
usala nalabo abafunda kancane abalekelele. Nokho-ke nakuba uthisha uMbali echaza
kanjena, lokhu akwenzekanga ngesikhathi esefundisa ukufunda okubhaliwe umcwaningi
embuka efundisa. Ngamanye amazwi lokhu ngulwazi analo kodwa angalusebenzisi.
Uthisha uMbali waphendula kanje ngenkathi ebuzwa ukuthi uye asebenzise ziphi
izindlela ukuhlola abafundi bakhe ukufunda umbhalo:
Senza ama passages, ngesikhathi befunda-ke ubahlukanisa ngokwama levels,
kukhona asebewo fast reader laba sebazi namagama amaningi, kube khona
lo ofunda ngalinye igama, ngalinye igama kanti ne-material obenzela yona
ayifani, uye ubenzele ethe thuthu laba abafunda kangcono kuthi laba abanye
ubenzele ethe ukuba lulanyana laba abangathi basatotoba, engconywana
abazokwazi ukuyiqonda.
Umcwaningi wabuye waqhubeka wabuza ukuthi abaze bangabuza yini laba abasele
emumva ukuthi kungani bona benikwa izindaba ezingafani nezabanye. Uthisha uMbali
waphendula kanje:
No, abazi futhi phela angithi bangama-groups, abasazi isizathu. Uye usho nje
ukuthi le group izothola lesi siqephu, lena izothola lesi kanjalo kanjalo,
ubatshele ukuthi uma le group isiqede ukufunda lapha izobe isithatha indaba
eyenziwa yileli qembu, ngaleyo ndlela baye balangazelele ukuyofunda
izindaba ekade zifundwa abanye kwamanye amagroup. They want to go
there,bajahe ke ukufunda ezinye izindaba ezifundwa abanye.
Kanti uthisha uSbo waphendula ngendlela ehlukile ngoba yena wabeka kanje ngesikhathi
ebuzwa ukuthi uye asebenzise ziphi izindlela ukuhlola abafundi bakhe ukufunda
umbhalo:
179