isahluko 1 - UKZN ResearchSpace - University of KwaZulu-Natal

ucwaningo luveza ukuthi abakwenzayo othisha nabakholelwa yikho lapho befundisa
kuba nomthelela kwabakwenzayo ekilasini lapho befundisa (Nkosi & Mbatha, 2009;
Pajares, 1992; William & Burden, 1997; Farrell, 2005; Lapp et al, 2005; Chou, 2008).
Lokhu kukhombisa ngokusobala ukuthi lokhu kunomthelela ngisho nakuzo izindlela
zokufundisa lapho belekelela abafundi ukuze bathuthuke ngokwazi ukufunda
okubhaliwe.
2.9 UKUHLOLWA KOKUFUNDA OKUBHALIWE
uJoubert nabanye (2008, p. 128) babeka ukuthi lapho uthisha ehlola ukufunda
okubhaliwe, ukwenza lokhu esebenzisa izindlela zokuhlola ezihambisana nokufunda
okubhaliwe, ukuze ahlole ukuthi izindlela namasu abewasebenzisa kusebenziseke
ngempumelelo yini, nokuthi ingane ifunda ngendlela okulindeleke ukuba ifunde ngayo,
futhi iyathuthuka ekufundeni okubhaliwe. Isibonelo, lapho umntwana ehluleka ukufunda
umbhalo, kusuke kuchaza ukuthi umbhalo asuke ewufunda usuke ungaphezu kwezinga
lakhe lokufunda, kuye kufanele anikwe omunye ongaphansi ngokwezinga. Lokhu
kungenxa yokuthi umntwana nomntwana wehlukile kwabanye, kanti futhi akaqhudelani
namuntu, okusho ukuthi uthisha kumele amlekelele ekutheni aphumelele ngokwakhe,
angaqhathaniswa nabanye abafundi ekilasini (Joubert et al, 2008, p. 128).
2.9 IQOQA LESAHLUKO
Kulesi sahluko ngixoxe ngocwaningo oselwake lwenziwa mayelana nokufunda
okubhaliwe eNingizimu Afrika naphesheya kwezilwandle. Ngixoxile nangezinjulalwazi
ezahlukene ezizama ukuchaza indaba yokufunda okubhaliwe, ngaxoxa kafushane
ngenjulalwazi esetshenzisiwe ukuhlaziya okutholakele ngenxa yokuthi kuxoxwa kabanzi
ngayo esahlukweni sesine. Ngaphandle kwalokhu, ngixoxile nangezindlela namasu
okufundisa ukufunda okubhaliwe. Ngixoxile futhi nangezinkolelo nokufundisa
okubhaliwe, ukuze kucace ukuthi izinkolelo othisha abanazo zinomthelela
kwabakwenzayo lapho befundisa. Esahlukweni esilandelayo ngizoxoxa ngezindlela
ezisetshenzisiwe ekutholeni ulwazi locwaningo
84