isahluko 1 - UKZN ResearchSpace - University of KwaZulu-Natal

omunye onconyiwe nguthisha. Lokhu kwenza akulukhulisi ulwazi lwengane lolimi
lwesiZulu ngoba ingane ingakhula yazi ukuthi lapho ujabula noma uncoma kumbe
uzwakalisa injabulo ngenxa yokunconywa, kufanele ukwenze lokhu ngesiNgisi, hhayi
ngesiZulu. Okunye okwaphawulekayo ukuthi indlela abafundi ababehlala ngayo,
kwakuyindlela yamaqembu. Izihlalo zazingabhekile nje phambili kodwa zihleleke
ngokwamaqembu. Lokhu kwakuwukhuthaza umoya wokusebenza ndawonye nabanye.
Kodwa-ke phezu kwakho konke lokhu, kwaqapheleka ukuthi ukushisa emakilasini
kwakuvutha bhe, ikakhulukazi njengoba kwabe kusehlobo. Kanti amawindi amaningi
ayengavuleki ngenxa yokuthi ayefile. Ngezinsuku ezishisayo abafundi babejuluka babe
manzi ngenxa yokuthi sasingekho isipholisamoya (air-conditioner). Ngale kwalokhu,
kwakubuye kuzwakale nokushintsha komoya endlini, kuzwakale isishiphi njengoba phela
abantwana basebancane. Lokhu kwakwenza ukuphazamiseka ekilasini ngoba lapho
sekushintshe umoya, kwakuba nomsindo, abafundi bekhononda. Lokhu kuphambene
nokushiwo nguYoung (2002); noKumar (2007); kanye noJoubert nabanye (2008),
abachaza ukuthi ikilasi lapho kufundelwa khona ukufunda kumele lishaye umoya
omnandi lapho kushisa, lithokomale lapho kumakhaza, umfundi azizwe sengathi
usekhaya. Bachaza bathi lapho ikilasi lishisa kakhulu, abafundi bayozela balale futhi
nomoya awubi mnandi ekilasini.
Ngale kwalokhu, kuzo zombili izikole, kulelo nalelo kilasi ngasekhoneni emumva
nekilasi, kwakuba khona izincwadi ezindala kakhulu, eziyimfuhlalala ezibekwe nje phezu
kwedeski elilodwa noma zibe sekhabetheni elidala elingavaleki. Lezi zincwadi
zazingakhombisi ukuthi zike zifundwe ngelinye ilanga ngendlela ezazihleli ngayo.
Kanjalo nalapho umcwaningi ebukela othisha befundisa, akuzange kube khona usuku
lapho izincwadi zake zasetshenziswa khona ngabafundi noma nguthisha, kumbe babuke
nje izithombe. Lokhu akuhambisani nokushiwo nguJoubert nabanye (2008, p. 112)
ababeka ukuthi ekilasini kumele kube nekhona elinezinto zokufunda, okumele lihehe
abafundi ukuba baye kulo bazifundele noma yiyiphi incwadi, iphephandaba,
iphephabhuku, ukhaphethi wokuhlala abafundi lapho befunda ekhoneni lokufunda,
umqamelo wokuhlala, nokunye okuningi. Njengoba ngike ngachaza esahlukweni
266