isahluko 1 - UKZN ResearchSpace - University of KwaZulu-Natal

Njengamanje ukufunda okubhaliwe (learning to read) kubonakala njengento eqalayo,
ikhule, futhi eqala ngesikhathi ingane izelwe (Zimmermann & Hutchins, 2003; Block &
Israel, 2005) ngoba nanoma yini abantu abadala abayenzayo iyalekelela ekukhuliseni
ulwazi lolimi nokufunda okubhaliwe nokubhala enganeni (Strickland, 2004, p.86). Ngale
ndlela ikhaya kusobala ukuthi linomthelela omkhulu ekulekeleleni ingane ekukhuleni
kolwazi lokufunda umbhalo nokubhala. Yingakho nje abacwaningi bathola ikhaya
lomntwana njengendawo lapho ukufunda kuqala khona kahle kunokuba kungathiwa
ingane iqala ukufunda esikoleni (Machet & Pretorius, 2004; Strickland, 2004; Sugland et
al., 1995; Britto & Brooks-Gunn, 2001; Lapp & Flood, 2004; Lapp et al, 2003; Darling &
Westberg, 2004; Lapp et al., 2005).
Ngamanye amazwi, ukufunda umbhalo/okubhaliwe nokubhala kungenye yezinto
ezisemqoka ekhaya ekukhuliseni ingane, nalapho ukuphumelela kwayo esikoleni kuqala
khona (McKeough et al, 2006). Lokhu kusho ukuthi ukuqala kokukwazi ukufunda
okubhaliwe akusewona nje kuphela umsebenzi owenziwa uthisha esikoleni, kodwa
kusukela ekhaya lapho ingane izalelwa khona, iye njalo ngokukhula ifunda ukukhuluma
nokulalela kuze kufike lapho ikwazi khona ukufunda okubhaliwe nokubhala. Ngale
ndlela ukuqala kwengane ukukwazi ukufunda kuqala ekhaya njengoba abacwaningi
abaningi sebeke bakuthola lokhu (Strickland, 2004; Sugland et al., 1995; Britto &
Brooks-Gunn, 2001; Duffy, 2009; McKeough et al, 2006; Tracy & Morrow, 2006; Lapp
& Flood, 2004; Lapp et al, 2003; Darling & Westberg, 2004; Lapp et al., 2005).
ULapp nabanye (2005) bayakuqinisekisa ukuthi uthisha eyedwa akakwazi ukufundisa
ingane ukufunda umbhalo kanye nokubhala, kodwa kudingeka ukuba umzali abambe
iqhaza elibonakalayo ekulekeleleni ingane ukuba ifunde ukufunda imibhalo (p. 206).
Kanti baningi abacwaningi asebekuqinisekisile ukuthi ingane ethola usizo kumzali
ekhaya mayelana nokufunda nokubhala ayijwayele ukuba nenkinga esikoleni
nasempilweni yayo yonke yokufunda (Goodman, 1986; Morrow, 2005).
Abacwaningi abaningi abake babheka ukufunda nokubhala kanye nekhaya lomntwana
eminyakeni eyedlule babevame ukugxila olimini nakokukhulunywayo njengezinto
ezisemqoka ekuthuthukiseni nasekukhuliseni ulwazi lokufunda umbhalo nokubhala.
19