isahluko 1 - UKZN ResearchSpace - University of KwaZulu-Natal

Kula mazwi angenhla, kuyacaca ukuthi i-social constructivism inabo ubudlelwano
nolwazi ingane evele inalo, kumbe eza nalo lapho izofunda okubhaliwe, kanye
nosikompilo. Ezinye zezinto ayezigcizelela uVygotsky emibonweni yakhe yilokhu
akubiza nge-zone of proximal development nenkolelo yokuthi ukusebenza kwemiqondo
yethu kuncike ezintweni esizenzayo nesiphila nazo emiphakathini (Smith & Elley, 1994,
p. 82). Le-zone of proximal development ikhombisa ukuthi uma ingane ifunda,
kuhambisana nokuthi ilekelelwe ngendlela efanelekile ukuze iphumelele ekufundeni.
Ngakho-ke lokhu kuchaza ukuthi ingane uma ikwazi ukuzenzela yona imisebenzi
efundwayo ngokuzimela, ngaphandle kokulekelelwa, leyo ngane isuke isingasangeni
ngaphansi kwe-zone of proximal development. Lokhu kusho ukuthi siyafika isikhathi
lapho ingane isikwazi ukusebenza khona ngokuzimela, ingabe isadinga ukulekelelwa.
Ngamanye amazwi, zikhona izinto ezingaba yimisebenzi efundwayo, kodwa ezingebe
zisadingeka ekukhuleni kwengane, uma ngabe leyo ngane isikwazi ukuzimela,
ingasadinge lusizo ukuba ifunde ukufunda umbhalo. Ngakho-ke ngale-zone of proximal
development kunzima ukuqonda ukuthi izingane ngokwempela zithuthuka kanjani,
kusukela ebangeni lapho zicathula khona, zehluleka ukuqonda umbhalo, kuze kufike
lapho sezikwenza ngempumelelo lokhu. UVygotsky ubeka kanje:
The only good kind of instruction is that which marches ahead of
development and leads it; it must be aimed not so much at the ripe as the
ripening function...
(Vygotsky, 1978, p.104)
Yingakho-ke nje ama-social constructivists ebuka ukufunda okubhaliwe njengento
eyenzeka ngenxa yezinto umuntu azenzayo nazibonayo nahlangana nazo njalo
emphakathini. USangmin (2007) ubeka ukuthi abafundi bemibhalo basebenzisa izinto
eziningi eziphathelene nolimi namagama asolimini ukuze baqonde abakufundayo
embhalweni (p. 12). Kanjalo noYang (2004) uyavumelana nalaba babhali ngoba
uyakugcizelela ukuthi ukufunda okubhaliwe kuyinto eyakheka ngokuba umuntu abe
yingxenye yomphakathi, abuke futhi aphile nezinto azofunda ngazo. Ngale ndlela inhlalo
yabantu ineqhaza elibambile ngesikhathi ingane ifunda okubhaliwe, uhlobo lombhalo
117