isahluko 1 - UKZN ResearchSpace - University of KwaZulu-Natal

lungathathwa njengeziqalo zocwaningo kolunye ucwaningo lwenhlalo nakuba uTellis
(1997) ethi umklamo wocwaningo kumele wenziwe ngaphambi kwesikhathi socwaningo.
Ngale kwalokhu, oCohen noManion noMorrison (2008) noRobson (2002) babeka ukuthi
ucwaningo lwesimo luvama ukusetshenziselwa ukuchaza, lunikeze incazelo mayelana
nokuthile okucwaningwayo, kunokuba lunikeze izibalo ezithile njengemiphumela
yocwaningo (p. 253). Kanjalo noBabbie (2007) naye uyavumelana nalaba bacwaningi
lapho echaza ucwaningo lwesimo. Okubalulekile ngocwaningo lwesimo ukuthi akukhona
ukuthi kuba ngumuntu oyedwa noma isikhungo esisodwa esicwaningwayo; singaba
sisodwa, zibe mbili, njalonjalo; kodwa okubalulekile ukuba okucwaningwayo kulezo
zikhungo uma ngabe kuyizikhungo, kumbe izinhlangano, kube yinto eyodwa, hhayi
izinto eziningi ezahlukene.
Kubalulekile ukuba kugcizelelwe ukuthi ucwaningo lwesimo luyakwazi ukuzakhela
ngokwalo injulalwazi/ ithiyori engasiza nabanye abacwaningi ukuqonda ngesimo
esifanayo noma ngento efanayo. Okuhle ngocwaningo lwesimo ukuthi luyakwazi
ukuveza imbangela nomphumela wento ethile, ngenxa yokuthi ocwaningayo uya khona
ngqo lapho kusuke kwenzeka khona lokho afuna ukuqonda kabanzi ngakho ayozibonela,
axoxe nabahlanganyeli bocwaningo; ngaleyo ndlela azi ukuthi abantu abathile benziwa
yini ukwenza ngendlela ethile izinto futhi kunamphumela muni lokhu abakwenzayo
(Cohen, Manion & Morrison, 2008, p. 253). Ngaphandle kwalokhu uphinde athole
nokuthi banayiphi imizwa nemicabango ngaleso simo noma ngaleyo nto; esebenzisa
ulwazi aluthatha ngqo emilonyeni yabo, ebuka nalokho abakwenzayo (p. 253). UStake
(1995) benoYin (1994) bakhipha izindlela eziyisithupha zokuthola ubufakazi
ocwaningweni lwesimo, okuyilezi:
� Izincwadi: izincwadi ezibhalelwe umuntu (letters), iziqeshana zamaphephandaba
nokunye.
� Izinhlololwazi: ezivulelekile (open- ended) nenhlololwazi ehleliwe (structured
interview).
96