isahluko 1 - UKZN ResearchSpace - University of KwaZulu-Natal

izimelamsindo ezibhalwe phansi (sound recognition). Okwesihlanu akugcizelelayo
ukuthi, abantwana bayazuza futhi lapho besho imilolozelo kanye neminye imidlalo
yamagama. Okokugcina, uStreet (1997) ukholelwa ukuthi abantwana bayafunda ngokuba
yingxenye ekusebenziseni ulimi olukhulunywayo nolubhalwayo.
Ngakho-ke kulo msebenzi ngibuka ukufunda okusafufusa njengokuthuthuka kokuqonda
ngokubhaliwe nokuthuthuka kwengane ngokukwazi ukubhala nokufunda umbhalo,
okuqala ingakangeni esikoleni, nokuholela ekutheni ikwazi ukufunda okubhaliwe,
ukubhala, ukukhuluma, ukulalela, ukubuka, kanye nokucabanga.
4.9.3 UKUFUNDA OKUBHALIWE / UMBHALO (READING)
Ziningi izindlela zokuchaza ukufunda okubhaliwe / umbhalo. Lokhu kuyaye kuye
ngokuthi umuntu ukubuka ngayiphi indlela futhi esebenzisa siphi isibuko ukuchaza
ukufunda okubhaliwe (Sultana, 2003). Nakuba abacwaningi abaningi sebeke bakuchaza
ukuthi kuyini ukufunda okubhaliwe, kodwa kuze kube manje akukabi lula ukusho ukuthi
kunencazelo okuthiwa yiyona qwaba okumele ithathwe njengeyiyonayona. Ngamanye
amazwi ayikho incazelo enguthundazime kumbe engcono kunezinye. Isizathu saloku
ukuthi kuya ngakho ukuthi umcwaningi uthi echaza ukufunda okubhaliwe nje, ukubuka
ngaliphi iso, kanti futhi ukufunda okubhaliwe kwenzeka ngaphansi kwasiphi isimo
kumbe indawo (Smith, 1971, p. 176). Lapha ngingabala abacwaningi asebeke bakubheka
bakuchaza ukufunda okubhaliwe abafana no-Gee (2004), Joubert et al (2008), Pretorius
noMatchet (2004), Machet noPretorius, 2004; Duffy (2009), McKeough et al (2006),
Tracey & Morrow (2006), kanye nabanye abaningi. Ukufunda okubhaliwe akukhona nje
ukuthi wukufunda amagama noma izimpawu nezimelamsindo, noma ukuphinyiswa
kwamagama noma izinhlamvu zamagama; kodwa ukufunda okubhaliwe kusho ukuthi
ofundayo kumele afunde ngokukuqonda akufundayo.
Ngamanye amazwi ukufunda okubhaliwe kusho ukwakha umqondo mayelana nalokho
okufundwayo. Akusikhona nje ukufunda amagama njengokulandelana kwawo emshweni,
ufunde elinye emva kwelinye. Lokhu kufakazelwa nanguMnyango WeMfundo (2003)
133