isahluko 1 - UKZN ResearchSpace - University of KwaZulu-Natal

ngokuqondisisa (comprehension), ukuzilungiselela kukathisha, kanye nokufundiswa
kwamasu okufunda okubhaliwe ngokuqondisisa (Report of the National Reading Panel,
2000). Lokhu kukhombisa khona ukuthi inkinga yamazinga aphansi okufunda
okubhaliwe ayigcini nje lapha eNingizimu Afrika, kodwa yinkinga ekhungethe umhlaba
wonke jikelele.
Ngonyaka wezi-2005, uCallery e-Australian Catholic University wenza ucwaningo
lwezinhlelo zokuthuthukisa amazinga okufunda umbhalo emabangeni ase-junior
secondary. Wayecwaninga ngezinto ezinomthelela ekuthuthukisweni kwamazinga
okufunda kwalabo bafundi abadonsa kanzima ekufundeni okubhaliwe kula mabanga.
Imiphumela yocwaningo yaveza ukuthi abafundi abathwele kanzima ngokufunda
okubhaliwe banezizathu ezahlukene ngokuhluleka kwabo ukufunda, kanti futhi
banezindlela zabo ezahlukile zokufunda okubhaliwe, kunalezo zabafundi abangenazo
izinkinga zokufunda okubhaliwe.
Ucwaningo olwenziwa nguBarone (2002) eNyuvesi yaseChicago, lwaluhlola ukuthi
abafundi basemakilasini amabili asenkulisa babefundiswa kanjani ulwazi lokufunda
nokubhala (literacy). Imiphumela yocwaningo yaveza ukuthi esikhathini esiningi ulwazi
lokufunda nokubhala (literacy) lwalugxile ebudlelwaneni obuphakathi kwesimelamsindo
kanye nomsindo waleso simelamsindo. Ayemancane amathuba abafundi okufunda
okunomqondo lapho befunda izincwadi. Ngenxa yalokhu, ucwaningo lwaveza isithombe
sokuthi bane kuphela abafundi abathuthuka ekufundeni okubhaliwe okusafufusa;
ngamanye amazwi abakwazi ukudlulela ebangeni lokuqala ekupheleni konyaka (Barone,
2002, p. 415). Lolu cwaningo nalo luyaveza ukuthi ikhona inkinga mayelana
nokufundiswa kokufunda okubhaliwe kothisha, okuyiyona nto lolu cwaningo oluhlose
ukuyicwaninga.
Ngonyaka wezi-2008, uZhang eSingapore wenza ucwaningo oluyi-case study lapho
ayehlola khona iqhaza lokufundiswa kolwazimagama lapho kufundiswa ukufunda
ngokuqondisisa kubafundi besiNgisi. Ucwaningo lwaveza ukuthi abafundi ababazi
amagama ayizi-2 000 kuya kwayizi-3 000, ukufunda kwabo ngokuqondisisa
48