isahluko 1 - UKZN ResearchSpace - University of KwaZulu-Natal

Ukuze ucwaningo lungabe selusabalala kungekho lapho lugxila khona, okuyinto
engaphazamisa imiphumela lapho sekuhlaziywa okutholakele, kufanele kube khona
imibuzongqangi okuyiyona ezoluhola futhi ibe ngumgogodla wocwaningo. Le mibuzo
emithathu elandelayo yiyona ephendulwa yilolu cwaningo:
1. Othisha bamabanga aphansi bathini ngokufundisa ukufunda okubhaliwe
emabangeni aphansi esiZulu ulimi lwasekhaya?
2. Othisha bakufundisa kanjani ukufunda okubhaliwe olimini lwasekhaya lwesiZulu
kubafundi bamabanga aphansi?
3. Kungani othisha bamabanga aphansi befundisa ukufunda okubhaliwe ngendlela
abakwenza ngayo olimini lwasekhaya lwesiZulu?
1.16 UKUMA KWEZAHLUKO
� Isahluko sokuqala siyisendlalelo socwaningo. Lapha kuvezwa okuyizona zizathu
eziholele ekwenzeni lolu cwaningo, kuphinde kuvezwe nemibuzongqangi
okuyiyona izophendulwa yilolu cwaningo.
� Isahluko sesibili sidingida ukubuyekezwa kwemibhalo emayelana nokufunda
okubhaliwe/umbhalo; izinjulalwazi zokufunda okubhaliwe; izindlela namasu
okufundisa okubhaliwe, nokunye. Imibhalo ebukezwayo ihlanganisa eyasekhaya
eNingizimu Afrika, eyakwamanye amazwe ase-Afrika, kanye neyaphesheya
kwezilwandle.
� Isahluko sesithathu sidingida umklamo kanye nezindlela zocwaningo. Kuyavela
ukuthi lolu cwaningo liwucwaningo lobunjalo besimo (qualitative case study),
ngaphansi kwepharadaymu i-constructivist, izindlela zokuqoqa ulwazi ezifana
nezingxoxo, ukubuka othisha befundisa, ukuhlaziya imibhalo, njalonjalo.
� Isahluko sesine sidingida uhlaka lwenjulalwazi kanye nohlaka lwemicabango
yocwaningo. Kuzodingidwa ngensizakuhlaziya esetshenzisiwe i-social
constructivist kaVygotsky (1978), kanye nohlaka lwemicabango enjengokufunda
okubhaliwe (reading), ulwazi lokufunda nokubhala (literacy), njalonjalo.
37