isahluko 1 - UKZN ResearchSpace - University of KwaZulu-Natal

5.2.7 UKUBAMBISANA KOMZALI NOTHISHA
Ulwazi olutholakele luveza ukuthi lapho uthisha efundisa ingane ukufunda okubhaliwe,
ulekelelwa umzali ekhaya ngokuthi abambe iqhaza ukuba ithuthuke ekufundeni
umbhalo. Othisha bayaphawula ngokuthi bathwala kanzima lapho umzali engalibambile
iqhaza lakhe njengomzali ekulekeleleni ingane, okuba nomthelela ekutheni ingane
ithwale kanzima ekuthuthukeni kokufunda okubhaliwe, futhi ukufunda kwayo kuhambe
kancane. Bayancoma ukuthi izingane ezilekelelwa abazali ekhaya, zibamba kangcono
kunezingane ezingasizwa ngabazali. Isibonelo, uthisha uMbali uchaza kanje:
…Okunye esiye sikwenze ukuthi njalo ngoMsombuluko sibanika i-homework
yamagama ahambisana nendatshana mhlawumbe. Lowo msebenzi sibanikela
ukuthi baye nawo ekhaya bayowufunda belekelelwa abazali, ukuze kuthi
ngoLwesihlanu lapho sesibhala isipelingi nendatshana uma ikhona, uthole
ukuthi bangcono kakhulu. Kuyasiza kakhulu ukuthi abazali balekelele
abantwana ngoba wena thisha udinga ukubambisana nomzali ngengane ukuze
ukufunda kuhambe kahle. Ngaleyo ndlela ingane engatholi ukulekelelwa
ekhaya ayivami ukwenza kahle, kodwa ithwalisana kanzima ngoba kufanele
uchithe isikhathi esithe xaxa nayo ukuze nayo ingasaleli kwabanye.
Le nkulumo engenhla iyakhombisa ukuthi othisha bayaqonda ukuthi ukuze ukufunda
kwengane kube yimpumelelo, umzali kumele abe yingxenye yakho. Lokhu kugcizelela
khona ukuthi ukufunda kwengane kudinga yona ingane, umzali wayo kanye nothisha
bakhe unxathathu ngoba ngaphandle koyedwa phakathi kwabo, kungaba nzima ukufunda
kwengane. Njengoba ngike ngachaza esahlukweni sokuqala, abacwaningi abaningi
bayaligcizelela iqhaza okumele libanjwe ngumzali wengane lapho ithuthuka ekufundeni
okubhaliwe (Strickland, 2004; Sugland et al., 1995; Britto & Brooks-Gunn, 2001; Duffy,
2009; McKeough et al, 2006; Tracy & Morrow, 2006; Lapp & Flood, 2004; Lapp et al,
2003; Darling & Westberg, 2004; Lapp et al., 2005).
Njengoba ngike ngaveza ukuthi uLapp nabanye (2005) bayakuqinisekisa ukuthi uthisha
eyedwa akakwazi ukufundisa ingane ukufunda okubhaliwe kanye nokubhala, kodwa
kudingeka ukuba umzali abambe iqhaza elibonakalayo ekulekeleleni ingane ukuba
ifunde ukufunda okubhaliwe (p. 206). Kanti baningi abacwaningi asebekuqinisekisile
ukuthi ingane ethola usizo kumzali ekhaya ukuyilekelela ekufundeni nasekubhaleni
185