isahluko 1 - UKZN ResearchSpace - University of KwaZulu-Natal

oqinisekisa ukuthi ukufunda okubhaliwe akusho ukufunda amagama abhaliwe, kodwa
kungukuthola umqondo, ukwazi ukuthola umlayezo oqukethwe embhalweni, okuyinto
ekhula njalo lapho ofundayo ejwayela noma ezejwayeza ukufunda okubhaliwe (Joubert et
al, 2008). Lapho uGrabe (1991) echaza, ubeka ukuthi ukufunda okuyikho yilokho
okunenjongo ethile, okukhululekile, okukhulayo futhi kwakhe umqondo.
UPretorius (2009) ubeka ukuthi izinto ezisemqoka ekufundeni, uthisha lapho efundisa
okumele agxile kuzona kubantwana abasafufusa ekufundeni ulimi yilezi ezilandelayo:
ulwazi lwezimelamsindo noma lwemisindo, ulwazi lokuhlonza noma lokubona amagama,
ulwazimagama, ukufunda ngokungangingizi noma ngokunganqikazi, kanye nokufunda
ngokuqondisisa. Kanjalo ne-Teacher’s Handbook for Teaching Reading in the Early
Grades (2007, p. 11) iyakugcizelela ukuthi abacwaningi abaningi abaphathelene
nokufunda okubhaliwe bayavumelana ngokuthi lokhu kokuhlanu yikhona okubalulekile
okufanele abantwana abasafufusa ukuze bathuthuke ekufundeni kwabo okubhaliwe.
Kanjalo futhi uSweet benoSnow (2002, pp. 23-24) babuka ukufunda okubhaliwe
njengokwakhiwa komqondo wokufundwayo. Abanye abacwaningi nosonjulalwazi
bokufunda okubhaliwe, sebeke baba nempikiswano ngokuthi ukufunda okubhaliwe
empeleni kufanele yini ukuba kungathiwa ukufunda okubhaliwe uma ngabe lezi zinto
ezinhlanu esengike ngazibala ngenhla zingekho kumbe zingeyona ingxenye ebalulekile
ekufundeni okubhaliwe, ngaphandle-ke uma konke lokhu kukhona futhi kuyinto
ebalulekile lapho kufundwa okubhaliwe (Schnarrx, 2005). U-Goodman (1967) ugcizelela
ukuthi:
Reading is a psycholinguistic guessing game. It involves an interaction
between thought and language. Efficient reading does not result from precise
perception and identification of all elements, but from skill in selecting the
fewest, most productive cues necessary to produce guesses which are right
the first time. The ability to anticipate that which has not been seen, of
course, is vital in reading, just as the ability to anticipate what has not yet
been heard is vital in listening.
Lawa mazwi acashunwe ngenhla, akhombisa ukuthi uGoodman ubuka ukufunda
okubhaliwe ngehlo lama-psycholinguists. Ngamanye amazwi, lokhu kucacisa khona
ukuthi ukufunda okubhaliwe kuya ngokuthi lowo okuchazayo yena ukubuka kanjani.
134