isahluko 1 - UKZN ResearchSpace - University of KwaZulu-Natal

Ngesikhathi kusungulwa i-Readathon Campaign ngonyaka wezi-2001, u-Asmal
wakhuluma kanje:
Literacy is a strong weapon through which Africa could claim its rightful
place among the continents of the globe. It is therefore imperative that every
child in Africa must learn to read and write. African leaders and experts must
commit themselves to making this happen.
Ngokuka-Asmal, lokhu kwakuyobe sekwenzekile ingakapheli iminyaka emihlanu.
Lokhu kwathathwa nawuMnyango WezeMfundo njengesinyathelo esibalulekile kakhulu
ekuqedeni ukungakwazi ukufunda okubhaliwe nokubhala eNingizimu Afrika (Miller,
2005; Rule, 2003). Kwaba ngenxa yalesi sizathu-ke ukusungulwa kwe-African National
Literacy Initiative (SANLI) ngonyaka wezi-2000 (Bharuthram, 2006, p. 5). Kanjalo
futhi, ngonyaka wezi-2007, uhulumeni wayethembise ukusebenzisa isizumbulu semali
engange-R6.1 billion ekuthuthukiseni amazinga okufunda nokubhala kubantu
baseNingizimu Afrika ababalelwa ezigidini ezi-4.7, ababencishwe amathuba okufunda
esikhathini esiphambili (Segalwe, 2006, p.1). Ngaphandle nje komnyakazo kahulumeni
ekulekeleleni ngosizo lwemali, izinhlelo zokuthuthukisa amazinga okubhala nokufunda
nokubala aqhamuka nangezinye izindlela. Isibonelo, enye imali yanikelwa yizwe lase-
Netherlands, elanikela ngesamba sezigidi ezingama-70 ohlelweni lokuthuthukisa
ukufunda okubhaliwe nokubhala nokubala eNingizimu Afrika (SouthAfrica.info, 2009).
Kusukela ngonyaka we-1995, ukuphonsa esivivaneni sokuxazulula le nkinga yamazinga
aphansi okufunda nokubhala kanye nawokubala, uhulumeni waseNingizimu Afrika
wasukuma phansi wazama ukulwa nale ngqinamba yokuba nesizwe esingakwazi
ukufunda, ukubhala nokubala, wathatha la magxathu alandelayo: Kwasungulwa
imithetho okubalwa kuyo i-National Education Policy Act (No.27 of 1996), i-South
African Schools Act (No. 84 of 1996), i-Policy of Childhood Development (Department
of Education, 1996), i-Revised National Curriculum Statement (Department of
Education, 2002) kanye ne-Adult Basic Education and Training Act (No. 52 of 2000).
Ezinye zalezi zinhlelo nemizamo kahulumeni azizange zibe yimpumelelo ngenxa
yezizathu ezahlukene kanti futhi akubanga kusaqhutshekwa nezinye, njengayo nje i-
Ready to Learn Campaign (Bharuthram, 2006, p.7).
4