isahluko 1 - UKZN ResearchSpace - University of KwaZulu-Natal

Le nkulumo ecashunwe ngenhla iyakhombisa ukuthi nakuba othisha beqonda kahle
ukuthi yini okumele yenziwe ngabazali bezingane ukuze izingane zithuthuke ekufundeni
okubhaliwe, bazithola bethwele kanzima lapho abazali bengalibambi elabo iqhaza,
ngamanye amazwi babeke konke kuthisha.
5.3 INGXOXO
Njengoba ngike ngachaza esahlukweni sesine, uMnyango WezeMfundo (2008c, p. 11)
ubala izingxenye ezinhlanu ezibalulekile ekufundiseni ukufunda okuyilezi ezilandelayo:
ulwazi lwezimelamsindo, ulwazi lokubona/ lokuhlonza amagama, ukuqondisisa ,
ulwazimagama kanye nokufunda ngokunganqikazi/ ngokungangingizi. Njengoba
esahlukweni sesine ngike ngachaza ngokuthi ucwaningo oluvele lukhona luyagcizelela
ukuthi lapho ingane ihluleka ukuqondisisa umbhalo ewufundayo, okuyiyona njongo
yokufunda okubhaliwe, kusuke kungekhona nje ukuthi leyo ngane ihlulwa ukuqondisisa
umbhalo.
Ingane ingabonakala ihlulwa ukuqonda umbhalo ewufundayo, kanti inkinga ayiqalanga
lapho, kukhona enye yalezi zingxenye zokufunda okubhaliwe ezinhlanu exegayo kumbe
enyanyalatiwe ngesikhathi ifundiswa njengoba lapho ingane ifundiswa ukufunda kumele
zonke lezi zingxenye zithuthukiswe kahle, kuze kufinyelele lapho ingane isiwuqonda
umbhalo ewufundayo (Block & Israel, 2005; National Reading Panel, 2000; Zhang,
2008; Le Roux, 2002b; USA Department of Education, 2005; Callery, 2005; Samuels,
2006; Joubert, Bester & Meyer, 2008; DoE, 2007).
Kwatholakala ukuthi othisha abakugcizeleli ukuthi lapho befundisa ukufunda okubhaliwe
nabo babuka lezi zingxenye njengezibalulekile lapho kufundiswa ukufunda umbhalo
kulaba bafundi abasafufusa ekufundeni okubhaliwe. Abagxila kukho othisha
ukufundiswa kwemisindo, okuhambisana nokufundiswa kolwazi lwemisindo ne
zimelamsindo, ukufundisa abantwana amagama kanye nezincazelo zawo, bese
bekhuluma ngokufundisa amagama okumele abafundi bawazi kuleso naleso sifundo,
okungukuthi ulwazimagama. Abakhulumi ngokufundisa izingane ngokufunda
187