isahluko 1 - UKZN ResearchSpace - University of KwaZulu-Natal

1.16UKUFUNDA OKUBHALIWE NGOKWANAMUHLA
UCoyne, uKame’Enui kanye noCarnine (2007) bathi luningi ucwaningo oseluke
lwenziwa mayelana nokufunda imibhalo kodwa oluningi lwalugxile emaswini okufunda
ngokuqondisisa asetshenziswa abafundi abafunda kahle, kanti futhi lokhu kusabonakala
kuyinto esenzeka ngisho namanje. Ngaphandle kwalokhu, okunye ukuthi kwakuye
kutholakale ukuthi umcwaningi ugxile engxenyeni eyodwa kulezi ezinhlanu
ezibalulekile lapho umuntu efunda ukufunda, alibale ngezinye, angabe esabheka ukuthi
zonke lezi zingxenye ezibalulekile eziholela ekutheni umuntu akwazi ukufunda
ngokunomqondo. Lezi zingxenyana yilezi: ulwazi lezimelamsindo/ lemisindo, ulwazi
lokubona amagama ukufunda ngokunganqikazi/ ngokungangingizi, ulwazimagama
kanye nokufunda ngokuqondisisa (Coyne et al, 2009).
UCommeyras (2009) waseNyuvesi yaseGeorgia eMelika uyakuqinisekisa ukuthi
ukufunda umbhalo kuyilokhu okuyikhona nje ngenxa yokubhala noma ngenxa
yokubhaliwe. Kanjalo nokubhala ukuze kube yimpumelelo kudinga kube khona
ukufunda “Reading is what it is because of writing; and writing is what it is because of
reading”. Uqhuba achaze ukuthi ukuze umuntu akwazi ukufunda nokubhala (literacy)
kumele zombili lezi zinto zithathwe njengezisemqoka. Ngale ndlela ubalula ukuthi
ofundiswa ukufunda akumele ukufundiswa kwakhe ukufunda okubhaliwe kuthathwe
njengento eyehlukile noma eqhelelene nokubhala (Commeyras, 2009, p. 1). Isizathu
salokhu kungenxa yokuthi lapho ofundayo efunda, usuke efunda okubhaliwe, kanjalo
obhalayo, usuke ebhala ukuze abanye bafunde akubhalile. Ngakho kokubili ukufunda
nokubhala akumele kubukwe njengezinto eziqhelelene. Sengiphetha kulesi sigatshana,
kubalulekile ukuba othisha bazi ukuthi okuyiyona nto ebalulekile ukwenza into
esemqoka ‘ibe ngesemqoka’; okusho ukuthi into esemqoka ukwenza ingane ukuba
ikwazi ukufunda futhi ikuqonde kahle ekufundayo, futhi ibe nothando lokufunda.
Lokhu kufakazelwa nangu-Duffy (2009) obeka athi:
22