isahluko 1 - UKZN ResearchSpace - University of KwaZulu-Natal

sesithathu, le ndawo oJoubert nabanye (2008) babeka ukuthi kumele kube yindawo
ethandekayo, ezoheha abafundi ukuba babe nothando lokufunda futhi kube yindawo
ehlanzekile, abafundi bavame ukuziyela ngaphandle kukathisha ukuzifundela izincwadi
ezinezithombe nokunye (p. 112).
Ekilasini likathisha uThandi wasesikoleni iMbalenhle kwakunebhodi elalidliwe
ngumuhlwa elalingasasebenzi kodwa lisodongeni. Okunye okwaphawuleka ukuthi
kwakunezithombe ezindongeni njengoba ngike ngachaza phambilini kuso lesi sahluko.
Okwakumangalisa ukuthi lezi zithombe zazihambisana namagama azichazayo abhalwe
ngesiNgisi (picture-word association in English), njengoba ngike ngachaza endikimbeni
yezinsizakufundisa zokufunda okubhaliwe. Isibonelo, ekilasini likathisha uSbo,
kwakunezithombe emashadini ayishumi nesikhombisa. Onke lawo mashadi anezithombe
ayebhalwe ngesiNgisi. Kukodwa lokhu kwakumangalisa ngoba emabangeni aphansi
asikho isifundo esifundwa ngolimi lwesiNgisi, ngaphandle kolimi lwesiNgisi
lunjengesifundo esizimele. Amashadi ayebhalwe ngesiZulu, kuwo wonke amakilasi
ezikoleni zombili yilawo ayeba nomsindo othile osufundiwe phezulu, bese kulandela
amagama akhiwe ngalowo msindo. Kwamanye amashadi esiZulu kwakuba nendatshana
emfushane eyimigqa embalwa eyayiba nalowo msindo. Isibonelo, ekilasini likathisha
uSbo ayemathathu kuphela amashadi ayebhalwe ngesiZulu, nawo futhi kungewona
amashadi amahle anemibala njengawesiNgisi. Lokhu kukhombisa ukuthi emakilasini
isiNgisi siyakhuthazwa kunolimi lwesiZulu. Ngikusho lokhu ngoba ingane ifunda ngazo
zonke izinto ezizungezile, esikoleni, emphakathini, nasekhaya (Vygotsky, 1978, 1986;
Gee, 2004; Sangmin, 2007; Harry, 2003; Cheng, 2003).
7.2.4.2 IKHAYA NJENGENDAWO LAPHO OKUQALA KHONA UKUFUNDA OKUBHALIWE
(THE HOME ENVIRONMENT AS THE STARTING POINT OF LEARNING TO READ)
Njengoba ngike ngachaza esahlukweni sokuqala, ikhaya lineqhaza elilibambile
ekulekeleleni ingane ukuba ithuthuke ekufundeni okubhaliwe. Abazali bengane
bangafundela ingane izindaba ekhaya, balekelele izingane ukuba zifunde, bazigqugquzele
ukuba zithuthuke ekufundeni imibhalo, bazixoxise, zifunde amaphephandaba
namaphephabhuku ekhaya, njalonjalo. Kodwa othisha babekhononda njalo ngezingane
267