isahluko 1 - UKZN ResearchSpace - University of KwaZulu-Natal

for Learning; kanjalo ne-National Reading Strategy, okukhulunyiwe ngakho esahlukweni
sokuqala. Ngaleyo ndlela kuyacaca ukuthi leyo ngane ekupheleni konyaka ngeke
iphumelele ngoba ‘ayikwazi ukufunda’. Lokhu kuveza isithombe sokuthi ziningi izingane
ezingaphumeleli kula mabanga ngenxa yokuthi zibonakala ‘zehluleka ukufunda’ ngenxa
yokuthi azikwazi ukubhala ‘kahle’ amagama.
I-social constructivist theory ayihambisani nokuthi ingane ivimbeke ekuthuthukeni
kokufunda okubhaliwe ngenxa nje yokuthi ayikwazi ukubhala, njengoba ukubhala
kungeyona injongo esemqoka yokufunda okubhaliwe, kodwa kuwukuqondisisa umbhalo
ofundwayo. Kwatholakala ukuthi ngenxa yokungabi nalolu lwazi othisha bagxisha
izingane ngokwazi ukubhala, kunokuba zifundiswe imibhalo enhlobonhlobo ukuze
zithuthuke ekufundeni okubhaliwe. Kwatholakala ukuthi othisha benza abakwenzayo nje
yingoba abanalo ulwazi ngenjulalwazi ye-social constructivism ngoba ababekwenza
kwakungahambisani nemigomo nezinhloso ze-social constructivist theory. Ngaleyo
ndlela okuyisona sizathu esisemqoka kulokhu kungasebenzisi kwabo injulalwazi i-social
constructivism ukungabi nolwazi olwanele ngayo. Lokhu kwenza ukuba banamathele
ezindleleni ezindala zokufundisa, ezingahambisani ne-social constructivist theory.
Ukucacisa leli phuzu, othisha babezincoma ngokuthi bafundisa kahle izingane ukufunda
okubhaliwe kulezi zikole, ngoba abakwenzayo kubenza baziqhenye ngakho ngoba
izingane zabo ziphuma sezikwazi kahle ukubhala, okukhombisa ukuthi ziyakwazi
ukufunda okubhaliwe.
I-Foundations for Learning ukuba othisha bayayilandela ngabe abagxili emisindweni
ngendlela yokuthi kube sengathi okuyiyona nto ebalulekile ekufundeni okubhaliwe ukuba
ofundayo akwazi ‘ukubhala kahle amagama’ awabhale awathole onke. Lokhu akuyona
injongo yeFoundations for Learning. Ngokwe-Foundations for Learning, uthisha kumele
afundise ingane ukuba ibe nolwazi lwemisindo, ibe nolwazi lokubona amagama, ifunde
ngokungangingizi, ithuthuke kulwazimagama, futhi iqondisise umbhalo ewufundayo.
Lokhu kuyahambisana ne-‘Handbook on Teaching Literacy in the Early Years’ neminye
imithombo ehambisana noMnyango WezeMfundo. Ngaleyo ndlela-ke nakuba
beyisebenzisa i-social constructivism, bayisebenzisa ngokusezingeni eliphansi.
282