isahluko 1 - UKZN ResearchSpace - University of KwaZulu-Natal

abazange baye emtatsheni wolwazi. Izincwadi ababezisebenzisa ekilasini kwakuyincwadi
efanayo kuwo wonke umfundi osekilasini (kuwo omabili amabanga kwakunjalo). (Bheka
iseleko se-16 ekhasini lama-387 ohlwini lwezeleko). Njengoba sengike ngaveza
phambilini, ngaphandle kwalokhu ebangeni lesibili kwakukhona izindaba ezibhalwe
ngesandla ababebuye bafundise ngazo. Nazo lezo zindaba kwakuba yindaba efanayo,
eyayinikezwa abafundi ngokwamaqembu amalunga mane.
Othisha babezisebenzisa izinsizakufundisa zokufunda okubhaliwe, ezinjengamashadi,
amagama asikiwe, imisho esikiwe kanye nezithombe ezimbalwa ababezidweba
emashadini nasebhodini. Lokhu kwaveza umqondo wokuthi othisha bayazi ukuthi lapho
ufundisa ukufunda okubhaliwe kumele usebenzise izinsizakufundisa ezithile. Kodwa
isimanga kwaba ukuthola ukuthi ezindongeni kwakugcwele izithombe ezichazwe
ngamagama esiNgisi. Isibonelo: isithombe sesihlalo sasibhalwe ngezansi ukuthi ‘chair’,
isithombe se-aphula sibhalwe igama elithi ‘apple’. Asikho nasinye isithombe
esasichazwe ngesiZulu.
Ayemaningi amashadi odongeni ezithombe ezinamagama esiNgisi. Ezinye zalezi
zithombe kwakungezona ezesifundo sesiNgisi, kodwa kwakungezezinye izifundo njenge-
Life Orientation, iMathematics, nokunye. Kwamangaza futhi lokhu ngoba umgomo
woMnyango weMfundo wolimi lwezikole zamabanga aphansi ugunyaza
ukusetshenziswa kolimi lwebele ekufundiseni izingane kuzo zonke izifundo kula
mabanga amane okuqala esikoleni (Language in Education Policy for Schools, 1997).
Nokho-ke izithombe ezazisezindongeni zazingakufakazeli lokhu kuwo onke amabanga,
kuzo zombili izikole.
Njengoba ngishilo ngenhla, amagama nemisho esikiwe (flash cards and sentence strips)
kwakusetshenziswa ngothisha. Lokhu babekusebenzisa ekufundiseni imisindo, ukwakha
amagama anemisindo abayifundisayo, nemisho. Ibhodi balisebenzisa kakhulu othisha
ukukhombisa imisindo, kanjalo namagama nemisho. Imidwebo nayo babeyenza
ebhodini. Kanti imisindo esifundiwe yayihlala ikhona engxenyeni eyodwa yebhodi. Le
misindo babeyisebenzisa ekufundiseni ukwakha amagama nokuwapela, kanjalo nemisho.
260