isahluko 1 - UKZN ResearchSpace - University of KwaZulu-Natal

Reading Rockets, 2009; Zimmermann & Hutchins, 2003; Smith & Elley, 1994; Block &
Israel, 2005; Reading Rockets, 2009; Snowling & Hulme).
Ngale ndlela lokhu kusho ukuthi ingane ayilekeleliwe ngokwenele ukuba ithuthuke
ekufundeni okubhaliwe. Abacwaningi bayagcizelela ukuthi lapho elinye lamakhono
lingafundisiwe kahle noma linyanyalatiwe, lokho kungaba nomthelela omubi
ekuthuthukeni kwengane ekufundeni okubhaliwe (Duffy, 2009; Poulton, 2007; Fukkink,
Hulstijn & Simis, 2005; Cunningham & Stanovich, 1998; Bester, 2008).
6.2.2.3 NGOLWESITHATHU
Ngosuku lwesithathu uthisha wathi eqala isifundo wathi abafundi abasho izilandelo,
esokuqala sasithi ‘Isinamangobe’ kanti lapho beqeda lesi wabe esethi mabasho u ‘Vuka
vuka mfana’. Okwaqapheleka ngalezi zilandelo ukuthi zazingahlobene nomsindo
owethuliwe weviki u ‘sh’. Lapho beqeda lezi zilandelo uthisha wabe esebakhumbuza
ngomsindo ka ‘sh’ okwakugxilwe kuwo ngoMsombuluko, wathi mabawufunde
ngaphandle kukankamisa kuqala, emva kwalokhu wafaka onkamisa, abafundi base
beyafunda. Lesi senzo sikhombisa ukuthi uthisha wayengazi ukuthi kungani izingane
kufanele zisho lezi zilandelo ngoba zazingenabudlelwano nengqikithi yokufundwayo.
Wayelungise amagama emaphepheni asikiwe, ukuze abize umfundi ngamunye ukuba
alifunde, maqede alinamathisele ebhodini. Lapho elinamathisela igama, babexoxa ngalo
kuqala. Wakwenza lokhu aze aphelela amagama. Lapho esenanyekwe onke ebhodini,
wabe esebakhombela wona ukuba bawafunde. Lokhu kukhombisa ukuthi uthisha
wayekhuthaza abafundi ukuba bakwazi ukubona/ukuhlonza amagama. Isibonelo
senkulumo-mpendulwano aba nayo uthisha nabafundi bakhe lapho ekhombisa igama
negama abafundi balifunde:
T: Lithini leli gama?( eveza igama elithi ishoba)
L: Ishoba( besho kanyekanye)
T: Konje yini ishoba
L: Umsila wenkomo
T: Good, lenzani leli ishoba
220