isahluko 1 - UKZN ResearchSpace - University of KwaZulu-Natal

6.2.1.2 UKWETHULWA KOMSEBENZI WOSUKU NOSUKU
6.2.1.2.1 NGOMSOMBULUKO
NgoMsombuluko lapho iviki liqala, kulapho uthisha ethula umsindo omusha. Lapho
ethula lowo msindo, uqala ngokudweba ebhodini umfanekiso wento ethile igama layo
elizoba nomsindo lowo ozokwethulwa futhi umsindo ozobizwa ngayo. Ngesonto
lokubukela othisha befundisa kwakugxilwe emsindweni ka ‘ph’ njengoba ngike ngaveza
ngenhla, uyedwa uthisha owayegxile emsindweni ka ‘hl’. Njengoba besengike ngachaza
phambilini, umsindo u ‘ph’ othisha bafundisa abantwana ukuthi umsindo wophaphe,
batshela izingane ukuthi wakhiwa ngokuhlanganisa umsindo wepani nomsindo wehawu.
Kanti umsindo u ‘hl’ othisha bathi umsindo wehlahla, owakhiwa ngokuhlanganisa
umsindo wehawu nomsindo welala. Ngesikhathi othisha bethula umsindo u ph’
babebhala isithombe sophaphe, babuze abantwana ukuthi sithombe sini abasibonayo.
Abantwana babephendula ngezindlela ezahlukene kodwa kugcine ngokuthi kube khona
ozokwazi ukubona ukuthi sithombe sini esidwetshiwe ebhodini kumbe eshadini
elinamekwe ebhodini. Isibonelo, uthisha uMbali wadweba uphaphe ebhodini wabe eseba
nale nkulumo-mpendulwano nabafundi bakhe ngesikhathi ethula umsindo ka ‘ph’:
T: Ubani ongangitshela ukuthi yini le engiyidwebile?
L1: Imbali
T: Hawu ngeke akusiyo imbali le,omunye uthi yini?
L2: Isihlahla
T: Ngeke akusiso isihlahla lesi,omunye ucabangani?
L3: Isundu
T: Cha akusilo isundu.Yini?
L4: Uphaphe
T: Good uphaphe loluyana, yini?
L: Uphaphe (besho bonke kanyekanye).
Lokhu kwakwenziwa yibo bonke othisha basesikoleni iMbalenhle. Lokhu kungenxa
yokuthi amalungiselelo esifundo bawenza ndawonye. Isibonelo: ukuthi kuzofundiswani,
kanjani, njalonjalo. Nokho-ke uthisha nothisha wayebuye akhombise ikhono lakhe
195