isahluko 1 - UKZN ResearchSpace - University of KwaZulu-Natal

Ngale kwemibiko yamazinga aphansi okufunda okubhaliwe kubafundi baseNingizimu
Afrika, ucwaningo luyaveza ukuthi empeleni iningi labantu baseNingizimu Afrika
abakukhuthalele ukufunda umbhalo; abaningi abanandaba nokufunda umbhalo futhi
abakugqizi qakala lokho (Pretorius, 2002; Land, 2003; Sisulu, 2004; Tiemensma, 2007;
ne-South Africa. Department of Arts and Culture & Print Industries Cluster Council,
2007). Kanjalo noWafawarowa (2000) uyabeka ukuthi cishe amaphesenti angama-95
ezincwadi ezidayiswa ezwenikazi lase-Afrika ziyizincwadi zokufunda ezisetshenziswa
ezikhungweni zemfundo, hhayi izincwadi zokuzijabulisa nokunye okungale kokufundela
isikole (academic books), uma ziqhathaniswa nezingamaphesenti angama-35
zasemazweni ase-Europe. Ngamanye amazwi ukufunda kokuzijabulisa akuyona into
evamile e-Afrika. Ngaphandle kwalokhu, lolu cwaningo lwaveza futhi ukuthi
eNingizimu Afrika, zingamaphesenti angama-27 izikole ezinemitapo yolwazi (Pretorius
& Mampuru, 2007, p. 41). Lokhu nje kukodwa kukhombisa wona njalo amazinga
aphansi okufunda eNingizimu Afrika. Kuyinto encomekayo-ke nokho ukuba uMnyango
Wezobuciko Namasiko (Department of Arts and Culture, 2007) ulusukumele udaba
lwemitapo yolwazi njengoba lo mnyango uzinikele ekusebenziseni isizumbulu semali
engango-R180 000 000 (R180 million) ekwakhiweni nasekwenzeni ngcono imitapo
yolwazi, kuhlanganisa nokuthengwa kwezincwadi ukuze zifakwe kuyo le mitapo
yolwazi (Magubane, 2008, p. 1).
Okunye futhi ukuthi akuyona into ejwayelekile ukuthola ukuthi abazali, ikakhulukazi
emakhaya, balekelele noma bakhuthaze izingane zabo ngokufunda imibhalo. Isibonelo,
baningi abazali abangakwazi ngisho ukuthenga iphepha lodwa leli ukuthola izindaba
ezintsha, ngaleyo ndlela kuba lukhuni satshe-ke umzali sekudingeka athengele ingane
incwadi yokuba ifunde, okungenani nje incwadi yokufundela ukuzijabulisa. Ucwaningo
luveza ukuthi kunalokho uthola abazali abaningi bethengana namathoyizi ezingane,
okuyinto engayifundisi kangako ingane ngoba nawo lawo mathoyizi bavama ukukhetha
angasizi ngalutho enganeni, njengokut henga isibhamu, izimoto, nonodoli; bakhohlwe
ukuthenga okungenani eyodwa incwadi ukuze ingane ithole ulwazi lokufunda noma
ukubhala, okuyinto edingwa imfundo yayo (Nkosi, 2010; Magubane, 2008; Strickland,
2004).
21