isahluko 1 - UKZN ResearchSpace - University of KwaZulu-Natal

ubudlelwano nokufundwa kombhalo, ngaphandle kokuthi okubhalwayo kwabe
kuyisibizelo kanye nokubhalwa kwemisho emifushane eyayiqedelwa ngegama ababekade
belifunda emaphepheni asikiwe, futhi kumbe livele likhona ebhodini.
Nakuba wayefundisa ngezindaba, wayeba nawo amagama ayesuke ewabhale
emaphepheni asikiwe (flash cards) nemisho esikiwe (sentences strips). Kulawo magama
nemisho wayegxila emisindweni enezinhlamvu ezimbili noma ezintathu, futhi
okungamagama ayesuke ezotholakala endabeni eyayizofundwa. Leyo misindo namagama
nemisho ayegxile kukho uthisha, kwakuyilokho ayebona kungabadida abafundi lapho
sebengena endabeni. Imisindo wayeyiphimisa, afundise abantwana ukubizwa kwayo,
enze amagama anezibonelo ngayo. Kodwa umehluko ukuthi kwakungabi umsindo
ofanayo agxila kuwo njengaseMbalenhle.
Okwaqapheleka ukuthi ngosuku lwangoMsombuluko uthisha waqalisa isifundo ngokuthi
abakhumbuze izimpawu zokukhanyisa. Wabakhumbuza ngophawu lukangqi, ukhefana,
umbuzo, kanye nesibabazo, ebakhumbuza ukuthi zisebenza kanjani lezi zimpawu. Emva
kwalokho wabe esebhala ebhodini amagama amane kanye namagama ayizibabazo:
uDube, uNkawu, uBhejane, izimpondo, Wo! He! Wathi abafundi abafunde la magama.
Wayebabuza ngalelo nangalelo, kuxoxwe ngalo. Isibonelo:
T: Sithi yini lolu phawu (ubhala ungqi ebhodini).
L: Ifull stop.
T: NgesiZulu sithi ungqi.
T: Luyakhuluma lolu phawu, luthi uma ufunda indaba wahlangana nalo thula phela
uphumule isikhashana. Lolu? (ekhomba uphawu lokubuza).
L: (Abafundi bathule)
T: Uphawu lokubuza lolu, lapho ufunda indaba uyabuza.
T: Ake sibheke ke lezi zimpawu: lolu sithi yini? (ebhala uphawu lokubabaza).
T: Isibabazo ngoba uphawu lokubabaza. Lolu ? uphawu lokubuza, uma ubuza,
uyakhombisa ukuthi umbuzo.
T: Olunye uphawu (ukhefana) lokhu kuchaza ukuthi uma ufunda uyathula kancane,
uthule isikhashana esifushane uma ufunda uthi gozololo kanti uma ubona ungqi uthula
isikhashana.
T: Lolu ( .) ungqi, lokhu kusho ukuthi uma ufunda uthula isikhathi esijana uma ufika
kulolu phawu.
T: Ake sibheke-ke laphaya, uyabona ukuthi lithini leli gama? Lithini?
246