isahluko 1 - UKZN ResearchSpace - University of KwaZulu-Natal

2.3.1 UKUFUNDA OKUBHALIWE NGOKWE-SOCIAL CONSTRUCTIVIST THEORY
UVygotsky (1978) umcwaningi wase-Russia, waqamba i-social constructivist theory
yokufunda okubhaliwe. Le njulalwazi ibuye yaziwe ngokuthi yi-socio-historical theory.
NgokukaVygotsky (1978), ukufunda okubhaliwe (reading) kuyinto esondelene nalokho
umuntu akwenza noma aye akubone emphakathini noma endaweni ahlala kuyo. Kanti
ziningi izinto ezinomthelela ekufundeni okubhaliwe, kuhlanganisa umfundi aye akubone
ekhaya, ulwazi avele enalo ngalokho azokuthola embhalweni awufundayo, osekwake
kwamehlela, ake ezwe kukhulunywa ngakho, ake wakwenza, njalonjalo. UVygotsky
wayekholelwa ukuthi umntwana ukuze akwazi ukufunda okubhaliwe, kufanele axhumane
nabanye abantu, azi ngezinto ezimzungezile, ezenzeka endaweni nasemphakathini aphila
kuwo. Ngale ndlela, lokhu kusho ukuthi ukufunda ukufunda okubhaliwe (learning to
read) kwenzeka lapho umntwana ehlanganisa usikompilo nolwazi olusha kanye nolwazi
abevele enalo ngalokho akufundayo.
2.3.2 UKUFUNDA OKUBHALIWE NGOKWE-SOCIO CULTURAL THEORY
Izimpande ze-socio-cultural theory ka-Au (1997) zisemsebenzini kaBronfenbrenner
(1979), obeka phambili indaba yosikompilo (culture) ekufundeni okubhaliwe. Igcizelela
iqhaza elibanjwa yizinto ezifana nokwenziwa emphakathini (social), usikompilo
(culture), kanye nokuphathelene nomlando (historical factors) umuntu ake wakubona
noma wakuzwa (experiences) (Tracy & Morrow, 2006, p. 195). I-socio-cultural theory
igcizelela umqondo wokuthi umuntu izinto ake wazibona, zamehlela noma wezwa ngazo,
zihlonzwa usikompilo futhi lolu sikompilo lungabukwa njengento eyenzekayo futhi
esinesikhathi eside yenzeka, kanti futhi eguquguqukayo engamile ndawonye. Le
njulalwazi ihlobene kakhulu ne- social constructivism kaVygotsky.
58