isahluko 1 - UKZN ResearchSpace - University of KwaZulu-Natal

okubhaliwe kunoma yiluphi ulimi loMdabu eNingizimu Afrika, ikakhulukazi uma
kululimi lwasekhaya / lokuqala. Ucwaningo oluningi lwenziwe olimini lwesiNgisi. Kanti
nanxa lukhona olugxila ezilimini zabansundu, kodwa kuyaqapheleka ukuthi lolo
oluyimbijana lugxila olimini lokwethekelwa kulolo limi (Pretorius & Mokhwesana, 2009;
Pretorius & Ribbens, 2005; Prah, 1995; Le Roux, 2002a; Le Roux, 2002b). Kanti
nasemazweni angaphandle, ikakhulukazi eMelika; kuyacaca ukuthi ikhona inkinga
mayelana nokufundisa ukufunda okubhaliwe (Laufer, 1992; Ulijn & Strother, 1990).
Kuyaqapheleka ukuthi abacwaningi abaningi lapho becwaninga ngokufunda okubhaliwe,
iningi labo libheka ingxenye eyodwa yokufunda okubhaliwe (one constituent of reading),
bakhohlwe ukuthi yizo zonke lezi zingxenyana zokufunda okubhaliwe ngoku hlangana
eziholela ekutheni umuntu akwazi ukufunda okubhaliwe futhi akuqonde akufundayo.
Njengoba sengike ngachaza esahlukweni esedlule, inhloso yokufunda okubhaliwe ukuba
lowo ofundayo akuqonde, akhe umqondo ngakufundayo. Ngamanye amazwi, ngeke nje
uthisha avele athi, “Namhlanje sizofunda ukufunda ngokuqondisisa” ngoba ukufunda
ngokuqondisisa kungumphumela wokufunda okubhaliwe, kanti yiyona nhloso yokufunda
okubhaliwe.
Lokhu kusho ukuthi lapho uthisha efundisa ukufunda okubhaliwe, ekugcineni kumele
ingane ikwazi ukuqondisisa ekufundayo. Ngale ndlela kuyacaca ukuthi abacwaningi
abaningi esikhathini esiphambili babengabheki nje ukufunda okubhaliwe okunenhloso
yokufunda ngokuqondisisa umbhalo, kodwa kunalokho babebuka lezi zingxenye
zokufunda okubhaliwe kube sengathi zingakwazi ukuzimela ngokwazo, zingabi
namthelela kwezinye nazo ezibalulekile ekufundeni umbhalo. Kanti abacwaningi
bakamumva, bayagcizelela ukuthi ulwazi lwezinhlamvu zamagama noma
lwezimelamsindo (phonemic awareness), ulwazi lokubona (lokuhlonza igama) (word
recognition), ukufunda ngokungangingizi noma ngokunganqikazi (fluency),
ulwazimagama (vocabulary), kanye nokufunda ngokuqondisisa (comprehension), konke
lokhu kudingeka kuthuthukiswe kumfundi, kufundiswe kahle ngoba yikhona okuholela
ekutheni umfundi akwazi ukufunda okubhaliwe ngokuqondisisa.
41