isahluko 1 - UKZN ResearchSpace - University of KwaZulu-Natal

2.7 IKILASI LOKUFUNDELA NJENGENDAWO EBALULEKILE
EKUFUNDENI UKUFUNDA OKUBHALIWE
UDenise Young (2002) uthi ikilasi yikhaya elikude nekhaya lengane. Ukusho lokhu
uYoung ngoba echaza ukuthi ikilasi akudingi ukuba kube yindawo eyesabekayo
enganeni, ikakhulukazi esencane. Kodwa kunalokho ingane kumele ikujabulele ukuba
sekilasini. Ezinye zezinto ezenza ikilasi likulungele ukufunda ukuba umoya osekilasini
ube mtoti phakathi kukathisha nabafundi, phakathi kwabafundi bebodwa, kuvunguze
umoya wothando nokunakekela, njalonjalo (Young, 2002; Kumar, 2007). Ngaphandle
kwalokhu, laba bacwaningi babuye bachaze ukuthi ikilasi phela uma lifana nekhaya
kudingeka libe lihle, lingabi nezimpahla eziyimfucuza njengefenisha engasebenzi,
ukukhanya kungene kahle, lifudumale lapho kumakhaza, liphole kamnandi lapho
kushisa, njalonjalo. Kanti noJoubert nabanye (2008, p. 112) bababeka ukuthi ekilasini
kumele kube nekhona elinezinto zokufunda, okumele lihehe abafundi ukuba baye kulo
bazifundele noma yiyiphi incwadi, iphephandaba, iphephabhuku, ukhaphethi wokuhlala
abafundi lapho befunda ekhoneni lokufunda, umqamelo wokuhlala, nokunye okuningi.
2.8 IZINKOLELO NOKUFUNDISWA KOKUBHALIWE (BELIEFS AND THE
TEACHING OF READING)
Izinkolelo ngezinye zezinto ezenza othisha babambelele kulokho abakholelwa yikho.
Izinkolelo othisha abanazo zinomthelela kwabakwenzayo ekilasini, okungahlanganisa
izindlela namasu okufundisa, izinjulalwazi abazisebenzisayo, indlela abahlela ngayo
umsebenzi wabo, nokunye (Pajares, 1992; William & Burden, 1997; Farrell, 2005, Chou,
2008; Nkosi, 2010; Nkosi & Mbatha, 2009). Lokhu kuveza umqondo wokuthi uma lezo
zinkolelo kungezilusizo, ziba nomthelela omuhle kwabakwenzayo othisha lapho
befundisa izingane. Kanti lapho lezo zinkolelo zingenalusizo, zingadala inkinga ekutheni
kuthi nalapho sekukhona isidingo sokuthi basuke kuzo, kodwa kube lukhuni
ukwenzenjalo. UPardo (2004) uqinisekisa ukuthi lapho othisha bekuqonda kahle okumele
kwenzeke lapho befundisa ukufunda okubhaliwe, bangazifundisa kahle kakhulu izingane
ukuba zikwazi ukubhala nokufunda okubhaliwe (p. 272). Lokhu kungenxa yokuthi
83