isahluko 1 - UKZN ResearchSpace - University of KwaZulu-Natal

zinkolelo, ezinye ziyahambisana nemigomo ye-social constructivist theory. Lokhu
kwakuvela nasemaswini abawasebenzisayo ekufundiseni ukufunda okubhaliwe.
Luningi ucwaningo oluveza ukuthi amasu okufundisa kanye nawokufunda okubhaliwe
kusiza abantwana ekwenyuseni izinga lokufunda ngokuqondisisa lapho behlangabezana
nezinkinga ekufundeni okubhaliwe (Cheng, 2003; Lee, 1998; Yigiter, et al 2005; Yang,
2004; Chamot & El-dinary, 1999; Cohen 1998). Njengoba ngike ngachaza esahlukweni
sesibili, olunye ucwaningo oselwake lwenziwa lwalubheka amasu asetshenziswa
ngothisha ekufundiseni ukufunda okubhaliwe, kanti olunye lwalubheka ukusetshenziswa
kwamasu okufunda okubhaliwe ngabafundi (Sangmin, 2007; Bharuthram, 2006),
kwatholakala ukuthi ukufundisa okubhaliwe kudinga ukuthi uthisha abe namasu
nezindlela azisebenzisayo ukuze aphumelele ekufundiseni izingane. Ngakho-ke othisha
ngenxa yezinkolelo abanazo ngamasu abawasebenzisayo ekufundiseni okubhaliwe, baye
basebenzise lezo zindlela zokufundisa ukufunda okubhaliwe. UBlaine (2007) ufakaza
ngokuthi uma ukufunda kwengane esikoleni kuyimpumelelo ngendlela yokuthi ingane
nengane ikwazi ukufunda okubhaliwe kanye nokubhala, kanjalo nokubala; lokhu
kungaba nomphumela omuhle kakhulu lapho ingane iqhubeka nokufunda idlulela
ezikoleni zamabanga aphezulu, ngisho nasezikhungweni zemfundo ephakeme.
Ezinye izinkolelo othisha abanamathela kuzo yilezo ezisukela olwazini lwakudala,
okuyizindlela ababefundiswa ngazo bona beseyizingane njengoba sengike ngachaza
(Nkosi, 2010; Pajares, 1992; Pardo, 2004). Olunye yilolo asebelusebenzise isikhathi
eside, okunzima ukuba basuke kulo. Kulolu cwaningo kuyavela ukuthi othisha bafundisa
ngendlela yokufundisa imisindo ngenxa yokuthi bathembele olwazini lwakudala
ababefundiswa ngalo bona besakhula. Bakwenza lokhu besebenzisa indlela
yokuphindaphinda (drill method), banamathele emsindweni owodwa futhi kufundwe
amagama nemisho eyodwa kuze kuphele iviki. Ngenxa yalokhu kuphindaphinda into
eyodwa, lokhu kudala ukuthi ukuthuthuka kokufunda okubhaliwe kuhambe kancane
ezinganeni. Ngale ndlela lokhu kuyashayisana nenqubo yama-social constructivist,
eqikelela ukuthi ingane ithuthuke ekufundeni okubhaliwe ngokuthi kube yiyona ehamba
277