isahluko 1 - UKZN ResearchSpace - University of KwaZulu-Natal

elehlukile, njengokuthi nje enze okungenziwanga abanye othisha, yize kufundiswa into
eyodwa futhi kube kuhlelwe ndawonye.
Lapho eseqedile ukuxoxa nabafundi ngophaphe, uthisha wayeye acele abafundi ukuba
bamnike amanye amagama analo msindo. Lokhu kwakwenziwa yibo bonke othisha
baseMbalenhle bebanga lesibili. Nakuba othisha babedweba izithombe ukwethula
umsindo, kodwa uthisha wayebuye asebenzise neminye imidwebo yamagama ezinto
analo msindo. Lokhu babekwenza ukuze abafundi babe naso isithombe sezinto abafunda
ngazo, kungabi wuphaphe kuphela. Nakuba yayiba khona eminye imifanekiso
enamagama analo msindo, kodwa lokho kwakungaguquli igama elinamathiselwa kulo
msindo, u ‘ph’wawuhlala njalo kungumsindo ‘wophaphe’ noma u ‘hl’ kungumsindo
‘wehlahla’ noma ngabe ayengaba khona amagama afana nalana: uphayinaphu, pheka,
iphini, upholi, njalonjalo. Lapho abafundi sebeshilo ukuthi sithombe sini, othisha babeye
baqhubeke nokubuza ngalolu phaphe, babuze namanye amagama analo msindo, nawo
kukhulunywe ngawo futhi abhalwe phansi lapho abafundi bewanikeza. Uthisha uMbali
waqhubeka kanjena:
T: Yini enophaphe?
L: Inyoni.
T: Good! Inyoni inophaphe, nani futhi?
L: Inkukhu.
T: Yebo inkukhu inophaphe,okey ubani ongangibhalela noma angitshele ukuthi ubhalwa
kanjani umsindo wophaphe?
L: Umsindo wepani nomsindo wehawu
T: Very good,mshayeleni izandla.
L: Thank you,very much,keep it up,shine
T: (uphinde futhi ababhale nonkamisa ebhodini ukubakhumbuza,bese ebhala umsindo
usunonkamisa).
T: Ake nifunde nayiya imisindo yami ebhodini.
L: pha phe phi pho phu (bafunda baphinda kathathu)
T: Manje umuntu nomuntu uzongipha igama elinomsindo ka ‘ph’, ukhumbule ukusebenzisa lo
msindo nemisindo eminye esesiyifundile ukuze kwakheke igama elisha.
Amazwi okugcina acashunwe enkulumweni engenhla, afakazela khona ukuthi lapho
kwethulwa umsindo omusha, kusetshenziswa neminye imisindo esivele ifundiwe
ukukhombisa abantwana ukwakhiwa kwamagama. Ngamanye amazwi, lapho othisha
nabafundi sebekhulumile ngesithombe ebhodini kwaxoxwa nangaso, babeye babuze
196