isahluko 1 - UKZN ResearchSpace - University of KwaZulu-Natal

5.2.5.2 UKUFUNDISA IZINCAZELO ZAMAGAMA
Kubo bonke othisha ababeyingxenye yocwaningo, kwagqama ukuthi othisha
bayazifundisa izingane ukuba zazi izincazelo zamagama aphathelene nesifundo futhi
anomsindo okusuke kugxilwe kuwo ngalelo viki, kumbe athintekayo kuleso sifundo.
Lawo magama baye babafundise ngoba kusuke kufanele bawazi, kuzoba lula lapho
sebehlangabezana nawo endabeni abazoyifunda noma abayifundayo. Othisha bebanga
lesithathu babeka ukuthi bafundisa amagama okumele abafundi bawazi ingakafundwa
indaba, ukuze beqambe bethi bafunda indaba, bebe sebewazi, bazi nezincazelo zawo.
Lokhu kwavela kubo bonke othisha abebeyingxenye yocwaningo. Lapho uthisha efundisa
izincazelo zamagama, akavele nje akhulume ngalelo gama kuphela, kodwa ukhombisa
ngisho nalapho lingakwazi ukusebenziseka khona. Ngaleso sikhathi uthisha uzama
ukwakha isithombe engqondweni yezingane ngalelo gama. Uthisha uNtombifuthi uchaza
kanje:
Kanti kwesinye isikhathi kwa-Grade 3 siqala ngokubukeza okwakwa Grade
2, sichaze amagama size siwabhale phansi, singakangeni endabeni,
siwachaze, siwabhale ebhodini, baze bawazi, bathi beqambe bengena
endabeni bebe sebewafundile amagama. Okunye esikwenzayo ukuthi izinto
ezisendlini yokufundela sizilebule, sizibhale amagama azo ukuthi ziyini.
Kuyasiza kakhulu lokho.
Njengoba nocwaningo lusho, ulwazi lwezincazelo zamagama lubalulekile ekufundiseni
ukufunda okubhaliwe. Ucwaningo luyafakaza ukuthi lokhu kungakhuphula izinga
lokufunda ngokuqondisisa kubafundi (Stahl & Fairbanks, 1986; Biemiller, 2001;
Biemiller & Slonim, 2001; Hirsch, 2001; Dickinson & Neuman, 2006; NRP, 2000).
Nokho-ke ucwaningo luyagcizelela ukuthi ulwazi lwezincazelo zamagama noma
ulwazimagama kumele kufundiswe ngesikhathi umbhalo ofundwayo kuqhutshekwa
nokuwufunda, kunokuba uthisha afundise izingane ulwazimagama / izincazelo
zamagama ngaphambi kokuba umbhalo uqalwe ukufundwa (Pressley & Hilden, 2006;
Snowling & Hulme, 2007; Duffy, 2009; Lehr et al, 2008; Makar & Philpot, 2004;
Dickinson & Neuman, 2006; Block & Israel, 2005).
183