isahluko 1 - UKZN ResearchSpace - University of KwaZulu-Natal

kungafundwa ngekhanda kodwa ekuhambeni kwesikhathi abantwana bangafunda
ukuhumusha okubhalwe phansi. Ngaphandle kwalokhu, le ndlela ingagqugquzela ukuba
abantwana bakopishe okubhalwe nguthisha, noma ngabe abakubhalayo kungaba
namaphutha.
Le ndlela yokufundisa ukufunda okubhaliwe isetshenziswa ukukhulisa izinga lokufunda
umbhalo unjengoba unjalo (decoding) nokufunda ngokuwuqondisisa. Abantwana
abasafufusa badinga ukufundiswa nokuba babambe iqhaza bathuthuke ekufundeni
kwabo. I-Language Experience Approach (LEA) ivumela abantwana ukuba bafunde
okubhaliwe emazingeni ehlukene. Ngale ndlela, uthisha ufundisa izinto ezahlukene
ngesikhathi esisodwa, esebenzisa amagama avela ngakubafundi kanye nolimi
abalujwayele. Isukela emqondweni wokuthi ulimi kumele lusetshenziswe ukudlulisa
imibono, imicabango, kanye nezincazelo (Vacca et al, 2006). Isibonelo sale ndlela,
ukubhalisa abafundi indatshana. Lapha, abafundi bazakhela izifundo, besebenzisa ulimi
lwabo abalusebenzisayo. Abafundi bangazakhela izindaba zabo, izindaba abazakha
beyiqembu, abakubhalayo, ukufunda kuzwakale indaba noma inkondlo ifundwa
nguthisha nabafundi. Le ndlela ingasetshenziswa enkulisa, ebangeni lokuqala noma
lesibili ekufundiseni ukufunda kwekilasi lonke, nokugcina irekhodi lokwenza komfundi.
Ngale ndlela, izinto esezake zehlela umfundi noma wazenza zilekelela ekufundeni ulimi
(Gunning, 2005, p. 105). I-Language Experience Approach iqala ngokuthi ikilasi lixoxe
lonke, omunye nomunye axoxe indaba yakhe ngakwaziyo noma ngokwake kwamehlela.
Emva kwalokho uthisha ucela abafundi ukuba bakhe indaba ngalokhu abakade bekuxoxa,
akubhale eshadini elikhulu. Emva kwalokho uthisha ufunda le ndaba afundele ikilasi.
Ngesikhathi abafundi befunda le ndaba, eqhamuka kwabebekusho, kwakheka
ulwazimagama. Ukusukela lapha, uthisha usengagxila kokukodwa afundise ngakho-ke,
kuye ngokuthi yikuphi okudingwa yikilasi lakhe.
75