isahluko 1 - UKZN ResearchSpace - University of KwaZulu-Natal

2.6 AMASU OKUFUNDISA UKUFUNDA OKUBHALIWE (TEACHING
STRATEGIES OF READING)
Kungumsebenzi kathisha ukuqinisekisa ukuthi indawo afundisela kuyo ikulungele
ukufunda ukuze abantwana bakwazi ukubamba iqhaza ekufundeni. Enye yezinto
ezisemqoka ukuba uthisha akhethe amasu okufundisa afanele izingane zakhe ekilasini.
Othisha basebenzisa amasu athile ukulekelela abantwana ukuba bathuthuke ekufundeni
okubhaliwe. Ngenxa yokuthi izingane azifani, yileyo naleyo ngane yehlukile kwenye,
uthisha kumele abheke lapho ekhetha amasu okufundisa ukufunda okubhaliwe ukuze
aqiniseke ukuthi ayahambelana nezidingo zabantwana bakhe. Okukhulu kunakho konke,
njengoba kunezindlela namasu amaningi ehlukene asetshenziswayo ekufundiseni
izingane ukufunda okubhaliwe, okusemqoka ukuba into emqoka igcinwe isemqoka.
Lokhu kusho ukuthi, into emqoka ukusiza abantwana ukuba bakwazi ukufunda
okubhaliwe futhi bakuthande. UDuffy (2009) ubeka kanje ukufakazela lokhu:
There is an old saying: “The main thing is to be kept the main thing.”
….explaining skills and strategies is not the main thing in teaching reading.
The main thing is to inspire students to be readers. If we teach skills and
strategies, but our students do not become readers, we fail. So, we must keep
the main thing the main thing.
(p. 3)
Ngala mazwi acashunwe ngenhla, kuyacaca ukuthi into esemqoka ekufundiseni ingane
akukhona ukuba kuchazwe izindlela zokufundisa kanye namasu, kodwa okumqoka ukuba
ingane isizwe ukuba ikwazi ukufunda okubhaliwe, ukuze ibe ngumfundi wombhalo
ophumelelayo. Ngamanye amazwi izindlela namasu okufundisa ukufunda okubhaliwe
akusiyona into emqoka, kodwa okumqoka yinoma yini uthisha angayenza ukulekelela
ingane ukuba ikwazi ukufunda okubhaliwe ngempumelelo. Ngaleyo ndlela, lokhu kusho
ukuthi akukho neyodwa indlela noma isu okungathiwa yilonalona elifanele ukufundisa
ingane ukuze iphumelele, kodwa yilokho uthisha akwenzayo kanye nokuthi ukwenza
kanjani okuyizona zinto ezisemqoka. Lokhu kungenxa yokuthi amanye amasu angafanela
ukusetshenziswa kwabanye abafundi, kodwa angasebenzi komunye umfundi.
78