isahluko 1 - UKZN ResearchSpace - University of KwaZulu-Natal

2.5.3 AMASU ASETSHENZISWA NGEMVA KOKUFUNDWA KOMBHALO (AFTER-
READING STRATEGIES)
Lana ngamasu alekelela ingane ukuba ithole umqondo ojulile ngalokho ekufundayo,
kwande ulwazi evele inalo mayelana nalokho efunda ngakho. Amanye amasu ayilolu
hlobo yilana ahlanganisa ukuphinda ufunde futhi umbhalo, uhlole injongo yombhalo,
ukuqinisekisa lokho obekuqageliwe noma obekucatshangwe ukuthi kuzokwenzeka
mayelana nombhalo ngesikhathi kungakangenwa kuwo, ukubhala isifingqo, ukujeqeza,
imibuzo, kanye nokwakha ubudlelwano phakathi kokufundwa ngakho nobuyena
umntwana noma ngempilo yakhe (Christen & Murphy, 1991, cited in AD-Heisat et al,
2009, p. 312). Ngezansi yisibonelo esisodwa sesu elingasetshenziswa nguthisha esigabeni
esingemva kokufundwa kombhalo.
2.5.3.1 UKUQINISEKISA (CONFIRMATION)
Leli yisu lapho ingane ikwazi ukuqinisekisa lokho ebikuqagelile ekuqaleni, uma ngabe
kwenzeke njengokuqagela kwayo. Uma kungahambanga kanjalo, kulapho umfundi ethola
khona ukuthi abekuqagelile akuzange kube yikho. Lokhu kungeke futhi kwathiwa yisu
elisebenza ekupheleni kwesifundo, lingasebenza noma kuphi ngesikhathi isifundo
siqhubeka. UJoubert nabanye (2008) bachaza kanje lapho bechaza ngaleli su lokufundisa
okubhaliwe:
This refers to the ability to establish whether the prediction about the further
development of the text is realized as well as to determine whether that
which has been read makes sense. If the text does not make sense, the reader
must be able to correct himself.
Ngaleyo ndlela kubalulekile ukuthi izingane zizitholele zona ukuthi ebezikuqagelile kube
njengoba bezikuqagelile yini noma cha. Uma kunjalo, izingane ziyakujabulela ukuqagela
ngento bese okwenzeka embhalweni kuhambisane nebezikucabangile ukuthi kungahle
kwenzeke. Kanti nalapho kwenzeka okwehlukile, izingane ziyakujabulela ukufunda
ngento entsha. Yingakho nje uthisha kufanele abe nezincwadi ezahlukene zemibhalo,
kungabi yincwadi eyodwa ngoba lapho incwadi iyodwa, abantwana baze bayejwayele,
bangabe besaba nandaba nayo.
82