isahluko 1 - UKZN ResearchSpace - University of KwaZulu-Natal

zabo ukuze zifunde ngempumelelo. Nangaphandle kwalokho, iningi labazali,
lalingakaze liye esikoleni, ngakho kwakungaba nzima uma kwase kufanele lifundise
izingane ekhaya. Ngale ndlela ngakhula ngingabazi ubumnandi bokufunda imibhalo,
ikakhulukazi ngokuyiqonda. Ngangingebe nandaba ukufunda amakhasi alishumi onke,
ngibe namagama amaningi engingawazi, okwakungiphazamisa ekufundeni
ngokuqondisisa. Emva kwalokho kwakuzofanele ngibhale isibizelo ukuze kubonakale
ukuthi ngabe sengikwazi yini ukuwabhala lawo magama.
Sengisemabangeni aphezulu, kwabe kulukhuni ukufunda ngiqonde kahle, ikakhulukazi
uma kwakuyincwadi enkulu okumele ngiyifunde. Kwakuye kube nzima kakhulu-ke
lapho sengizofunda umbhalo ngolimi lwesiNgisi. Isibonelo, uma embuzweni
kwakukhona igama elifana nelisemshweni engiwubonayo endabeni engibuzwa ngayo
ekade ngiyifunda; ukuphendula, ngangivele ngiwuthathe wonke lowo musho, ngenxa
nje yokuthi unegama elifana nelisembuzweni. Kwakuba nzima-ke lapho sekuzofanele
ngichaze ngawami amazwi. Ngenxa yegama engilibonile elisembuzweni,
ngangingathatha ngisho isigaba sonke (paragraph) uma nje lelo gama lilapho, futhi
ngingaqondi kahle noma umbuzo ngiwuphendulile noma qha. Lobu bunzima bokufunda
bacishe bangenza ngayeka esikoleni, kwasiza nje ukuthi nganginabazali abanolaka,
lapho engangingeke ngiyenze into engiyithandayo, esengiye ngikubonge namhlanje.
Njengoba noTiemensma (2007) echaza, ezinye zezinto ezenza izingane ziphume
kangaka esikoleni, yindlela ezifundiswa ngayo kabi ukufunda okubhaliwe. URalphs
(2008) ubeka kanje:
The teachers teach according to their own understanding of what teaching is
and how to teach. This involves rote learning, memorisation, skill and drill,
talk and chalk, and a teacher-dominated orientation to classroom
activities…These practices have become normative and accepted...and as
such provide the children with a ‘restricted’ version of literacy.
(p.1)
La mazwi angenhla afakazela khona ukuthi othisha abafundisi ngokuzethemba ngenxa
yokuthi abanaso isiqiniseko ngabakwenza ekilasini.
35