isahluko 1 - UKZN ResearchSpace - University of KwaZulu-Natal

phambili ekwakhiweni kolwazi olusha, kube yiyo ebambe iqhaza elibalulekile
ekufundeni kwayo.
Othisha bakholwa ukuthi njengoba kuyindlela nabo abakhula befundiswa ngayo, yiyona
eyabasiza ekutheni bakwazi ukufunda okubhaliwe nokubhala baze babe badala. Kanti
futhi bakwenza lokhu ngoba yinto asebenesikhathi eside beyenza, futhi bakholelwa
ukuthi iyabasebenzela. Kanti nalabo abafundisa ngezindaba ukufunda okubhaliwe,
basebenzisa izindlela ezindala zokufunda okubhaliwe. Njengokuthi nje, bakhe uhlu
lwamagama okumele abafundi bawazi, okungamagama azotholakala embhalweni
ozofundwa, bawachaze, izingane zingazitholeli zona ngokwazo izincazelo zalawo
magama ngokusebenzisa ama-inferencing skills, ziqagele izincazelo zalawo magama
ngokubuka indlela asetshenziswe ngayo embhalweni, njalonjalo. Kanti njengoba ngike
ngachaza esahlukweni sesine, uPressley benoHilden (2006) bagcizelela ukuthi
kubalulekile ukuthi izingane zifundiswe izincazelo zamagama, ngamanye amazwi
ulwazimagama. Kodwa-ke lokhu akusho ukuthi uthisha kufanele enze uhlu lwamagama
okumele abafundi bawazi, kodwa kunalokho, uthisha kudingeka awafundise la magama
ngesikhathi umbhalo ufundwa, agxile kuwo ngandlela thile, ikakhulukazi uma
kungamagama ingane ezophinde ihlangane nawo nangemva kokufunda umbhalo lowo.
Lawo kungaba ngamagama angajwayelekile enganeni (Pressley & Hilden, 2006, p. 58).
Uma uthisha enikeza uhlu lwamagama kubafundi kanye nezincazelo, lokho indlela
yakudala yokufunza izingane ngokuthi zazi amagama lawo ukuthi abhalwa kanjani kanye
nezincazelo zawo (spoon-feeding). Le ndlela ingenza ukuthi abafundi bangazi ukuthi
incazelo yegama uyakwazi ukuyithola emshweni noma engxoxweni lapho igama
lisetshenziswe khona. Kanti uma uthisha ebafundisa ukuthi bakwazi ukuzitholela
incazelo ngokubukisisa ingxoxo bese beqagela incazelo yegama noma incazeelo
yomusho lokho kubafundisa ikhono lokukwazi ukufunda okubhaliwe. Emihleni abantu
uma befunda akudingeki ukuthi bazi incazelo yalelo nalelo gama uma befunda umbhalo.
Kodwa kumele bakwazi ukuqagula incazelo yenkulumo (message decoding) noma
bengazazi izincazelo zawo wonke amagama asetshenzisiwe. Isibonelo, kuye kwenzeke
sifunde amaphephandaba neminye imibhalo, kube namagama amaningi esingawazi,
278