isahluko 1 - UKZN ResearchSpace - University of KwaZulu-Natal

7.2.4 IKILASI NEKHAYA NJENGEZINDAWO EZIBALULEKILE EKUFUNDENI
KWENGANE OKUBHALIWE
7.2.4.1 IKILASI LOKUFUNDELA (THE CLASSROOM CONTEXT)
Njengoba ngike ngachaza esahlukweni sesibili ukuthi uYoung (2002) uthi ikilasi
yikhaya elikude nekhaya lengane. Ukusho lokhu uYoung ngoba echaza ukuthi ikilasi
akudingi ukuba kube yindawo eyesabekayo enganeni, ikakhulukazi esencane. Kodwa
kunalokho ingane kumele ikujabulele ukuba sekilasini. Njengoba ngike ngachaza
esahlukweni sesibili, ezinye zezinto ezenza ikilasi likulungele ukufunda ukuba umoya
osekilasini ube mtoti phakathi kukathisha nabafundi, phakathi kwabafundi bebodwa,
kuvunguze umoya wothando nokunakekela, njalonjalo (Young, 2002; Kumar, 2007).
Ngaphandle kwalokhu, laba bacwaningi babuye bachaze ukuthi ikilasi phela uma lifana
nekhaya kudingeka libe lihle, lingabi nezimpahla eziyimfucuza njengefenisha
engasebenzi, ukukhanya kungene kahle, lifudumale lapho kumakhaza, liphole kamnandi
lapho kushisa, njalonjalo.
Kwabonakala ukuthi othisha ababefundisa izingane zebanga lesibili nelesithathu kuzo
zombili izikole babenomoya omuhle ezinganeni. Emakilasini lapho kwakufundiselwa
khona ukufunda okubhaliwe umoya wokuthokomala nokuba sekhaya wawukhona.
Isibonelo, othisha babekhombisa ukuqonda ukuthi izingane abazifundisayo zincane
ngakho bangazicasukeli lapho zenza amaphutha noma zehluleka ukwenza
njengokulindelekile. Izingane zazikwazi ukukhuluma ngokukhululeka ekilasini, zibuze,
ziphendule ngendlela ekhombisa ukungabi nakwesaba, zize zigxume zifuna ukuba
uthisha azikhombe ukuba ziphawule noma ziphendule. Ezazingenakho okokubhala
zaziya kuthisha aziphe okokubhala, ongalolile ipeni uthisha amnike, ongenayo injobo
yokucisha aye kuthisha amuphe, njalonjalo.
Kwaphawuleka ukuthi othisha basebenzisa kakhulu indlela yokuncoma izingane,
ukuzikhuthaza ukuba zenze kahle, kodwa bakwenza lokhu ikakhulukazi besebenzisa
isiNgisi. Lokhu zazikuthanda izingane ngoba zazize zishaye ihlombe, nazo zithi: “Thank
you, keep it up, shine”, ukukhombisa ukuthakasela ukunconywa noma ukubongela
265