isahluko 1 - UKZN ResearchSpace - University of KwaZulu-Natal

Ucwaningo olwenziwa eNingizimu Afrika yiNyuvesi yasePitoli ngonyaka wezi-2007
lwe-International Association for the Evaluation of Educational Achievement (IAE),
lwahlola abafundi abayizi-215 000 bebanga lesi-4 bamazwe angama-40 omhlaba.
INingizimu Afrika yahambisa abafundi abayizi-30 000 bamabanga esi-4 nelesi-5
basezikoleni ezingama-400, abahlolwa kuzo zonke izilimi eziyishumi nanye
ezisemthethweni zaseNingizimu Afrika.
Kulolu cwaningo abafundi baseNingizimu Afrika abaphumelelanga kulezi zivivinyo,
bahluleka ukuhlanganisa okungenani imiklomelo eyisigamu saleyo eyabe yabiwe
(Blaine, 2007). Ngenxa yalokhu, owayenguNgqongqoshe WezeMfundo ngaleso sikhathi,
uNaledi Pandor, waqamba isu lokulekelela othisha, ayehlose ngakho ukunyusa amazinga
okufunda okubhaliwe kubafundi. Kwavela ukuthi abafundi ababalelwa kuma-80%
behluleka ukuphumelela kulezi zivivinyo. Lolu cwaningo lwe-Progress in International
Reading Literacy Study (PIRLS) lwakhombisa ukuthi babalelwa phakathi kwama-86%
nama-96% abafundi baseNingizimu Afrika abangazange baphumelele kulezi zivivinyo.
Lokhu nje kukodwa, kugcizelela sona isidingo sokwenza ucwaningo oluzobheka ukuthi
ukufundisa ukufunda okubhaliwe kwenzeka kanjani emabangeni aphansi ezikoleni.
Ngokunjalo, ucwaningo olwenziwa ezikhungweni zemfundo ephakeme eNingizimu
Afrika lwaveza ukuthi abafundi bafika ezikhungweni zemfundo ephakeme benamazinga
aphansi okufunda okubhaliwe futhi bengakulungele ukuba sezingeni lemfundo ephakeme
(Pretorius & Machet, 2004; Balfour et al, 2001; Balfour, 2002). Ngenxa yalesi sizathu,
labo bafundi bathwala kanzima ezifundweni zabo zasenyuvesi. Ngakho-ke kubalulekile
ukuthi othisha babafundise kahle abantwana, kusukela besebancane, ukuba bafunde, futhi
abakufundayo bakuqonde ngenxa yokuthi enyuvesi miningi imiqingo okudingeka
umfundi azifundele yena ngokwakhe engethembele kubafundisi. Lokhu kusho ukuthi
umfundi ongakwazi ukufunda aqonde akufundayo, uthwala kanzima. Ngaleyo ndlela
akulula ukuphumelela (Balfour et al, 2001; Dreyer & Nel, 2003; Saumell et al, 1999;
Wade, 1990).
53