isahluko 1 - UKZN ResearchSpace - University of KwaZulu-Natal

ngaphandle kukankamisa ‘i’. Unkamisa ‘a’ bathi yindingilizi enomsila ngezansi, u ‘e’
yindingilizi evaleke phezulu, u ‘i’ yindoda eqondile enechashaza, u ‘o’, yindingilizi
evalekile, kanti u ‘u’ yindingilizi evuleke phezulu. Kanjalo nasebangeni lesibili, othisha
basebenzisa indlela yecici ukufaka onkamisa kubafundi. Isibonelo: u ‘a’ yicici elivalekile
elinomsila ngezansi, u ‘e’ yicici elivulekile kodwa elivaleke phezulu, u ‘i’ yicici
eliqondile elinechashaza, u ‘o’ yicici elivalekile, kanti u ‘u’ yicici elivuleke phezulu.
Uthisha uJabu ukubeka kanje lokhu enkulumweni yakhe ecashunwe ngezansi:
[Odingilizana/indingilizi necici]Yizindlela zokufundisa onkamisa. Angithi
phela basuke bebhala emoyeni uthisha asebenzise indlela yokuthi basebenzise
igama elithi dingilizi”. Njengokuthi nje uma ebhala u ‘a’, uqale abhale
indingilizi bese efaka umsila, kanti ku ‘e’ leyo yindingilizi evulekile yase
ivalwa maphezulu, kanti u ‘i’ indingilizi eqondile engavalekile elinechashaza,
u ‘o’ yindingilizi evalekile, kanti u ‘u’ yindingilizi esuka phezulu iye phansi
inyuke bese ivuleka phezulu. Kanti uma besebenzisa indlela yecici, u ‘a’ nje
yicici elivalekile elinomsila, u ‘e’ yicici elivuleke eceleni lase livaleka
phezulu, u ‘i’ yicici eliqondile, kanti u ‘o’ yicici elivalekile eliyindilinga, kanti
u ‘u’ yicici’ elivuleke phezulu. Siye bese sifakela izinhlamvu kube amagama
aphelele sibhale umusho kugqame lowo msindo okuyiwona sigxile kuwo,
kube nama- questions, baphendule imibuzo leyo futhi bangaphenduli ngegama
elilodwa kodwa kube yimisho...
Ngale ndlela onkamisa bayabukezwa ebangeni lesibili yize bekade bebafundile isikhathi
eside ebangeni lokuqala. Empeleni umsebenzi webanga lokuqala uyabukezwa wonke,
kuye ngesivinini sabafundi, okuzokwenza ukuba uthisha akwazi ukufinyelela kulokho
abangazange bakufunde besesebangeni lokuqala. Lokhu kwenza umcwaningi azibuze
ukuthi kungani izingane ebangeni lesibili, okungunyaka wazo wesibili esikoleni,
zifundiswa onkamisa kube sengathi azikaze zibafunde. Ngale kwalokhu, okumangazayo
ukuthi uma babefunde ukuthi unkamisa othile yindingilizi ethile ebangeni lokuqala,
kungani bese kushintsha lokhu kube sengathi sekufundwa enye into ehlukile uma
sebesebangeni lesibili? Lokhu kungenza ukuthi izingane zicabange ukuthi lo nkamisa
ezazifunda ngaye ebangeni lokuqala kusho ukuthi akuseyena lowaya, sekungomunye
osho enye into, okuyinto engadala ukudideka kubantwana.
Kuyacaca futhi ukuthi ukufundisa onkamisa kuthatha isikhathi eside njengoba izingane
zibaqala ebangeni lokuqala, kodwa nasebangeni lesibili zibe zilokhu ziphindaphinda
152