isahluko 1 - UKZN ResearchSpace - University of KwaZulu-Natal

Lokhu kwakuphambene nababekusho ngesikhathi sezingxoxo ngoba babebike nokuthi
baye basebenzise nezichuse ezidwetshiwe (cartoons). Izinsiza zokulalela kanye
nokubhala zazingekho kuzo zombili izikole. Lokhu kwaveza isithombe sokuthi othisha
abaqondi ukuthi lapho kufundiswa ukufunda okubhaliwe, omane amakhono olimi kumele
ahlotshaniswe ukuze ukufundisa ukufunda okubhaliwe kube yimpumelelo. Lokhu
kuveza umqondo wokuthi izingane kungenzeka ukuthi sezinalo ulwazi
ngezinsizakufundisa zokufunda okubhaliwe uthisha eza nazo lapho ezofundisa.
Ngamanye amazwi lokhu kungaqeda nelukuluku kubafundi lapho kungekho okuza
nothisha okuhalisayo. Njengokuthi nje, lapho abafundi bazi ukuthi izinsiza
ezisetshenziswa nguthisha ziyini, akukho okungaziheha ukulandela okufundwayo ngoba
konke uthisha akwenzayo akukho okusha, yizinto umfundi azijwayele. Ngamanye
amazwi ukungabi bikho kwezinsizakufundisa ezintsha zokufunda okubhaliwe, kungaba
nomthelela ongemuhle kubafundi mayelana nokuthuthuka kwabo ekufundeni
okubhaliwe.
7.2.3 IZINDLELA NAMASU OKUFUNDISA UKUFUNDA OKUBHALIWE
Kwatholakala ukuthi othisha bakulezi zikole ezaziyingxenye yocwaningo, babesebenzisa
indlela yokufundisa ngemisindo (phonic approach), beyihlanganisa ne-look-and –say
method. Njengoba ngike ngachaza esahlukweni sesibili, indlela yokufundisa ngemisindo
igxila ekuphinyisweni kwemisindo, kanti futhi ibuye ibizwe ngokuthi yindlela
yokufundisa ulwazi lwezinguquko zemisindo noma yokufundisa izimelamsindo (Joubert
et al, 2008, p. 89). Le ndlela ixhumanisa okuzwakala ngendlebe kanye nalokho
okubonakala ngamehlo. Ayigxili kuphela ekuphinyisweni kwemisindo
njengasemagameni akhulunywayo, kodwa nasezincazelweni nasekwakheni kwamagama
ngokomqondo. Ngale ndlela, imisindo ifundwa ngokulandelana okwenzeka ngandlela
thize (Joubert et al, 2008, p. 89). Lokhu kwabonakala ekwenzeni kothisha.
Kanti uJoubert nabanye (2008, p. 91) bathi i-look-and-say method iyindlela ye-analytical
ngoba igxila kokuphelele bese ihlaziya izingxenye zakho (Joubert et al, 2008, p. 91).
Lokhu kusho ukuthi izingxenye zokuphelele zakha okuphelele. ULevy (2009) uthi, ngale
261