isahluko 1 - UKZN ResearchSpace - University of KwaZulu-Natal

Nokho-ke lokhu akusho ukuthi ukufunda okubhaliwe kumele kuncishwe isikhathi sakho,
kujahwe ekubhaleni. Ngakho-ke ngenxa yokuthi othisha abanalwazi olwanele
ngokuyiyona njongo yokufunda okubhaliwe, bajaha ukubhalisa izingane kunokuba
banike isikhathi esanele sokuthuthuka ekufundeni okubhaliwe, amazinga azo okufunda
kube ngawabafundi bemibhalo abasezingeni eliphezulu. Lapho isikhathi esiningi
sesithathwa ukubhala, umbuzo ongaqhamuka owokuthi lokhu kuyazilekelela yini
izingane ukuba zithuthuke ekufundeni okubhaliwe ngokuqondisisa, futhi zikhuthale,
zithande ukufunda imibhalo eyehlukene ngokuzimela? Lo mbuzo akukhombisi ukuthi
impendulo ingaba elindelekile neyiyo ngoba ukufundisa izingane ukuba zizimele
ekufundeni, ziqondisise ezikufundayo, yinto engatholakali kwabakushoyo nabakwenzayo
othisha.
Lokhu kungabi nolwazi olwanele kothisha lokufundisa ukufunda okubhaliwe, kwenza
ukuba bathi lapho befundisa, basebenzise namagama angawezinto ezingekho
emphakathini izingane eziphila kuyo, kanye nezenzo ezingeke zaziqonda izingane ngoba
azikaze zidlule kuzona futhi akulula ukuba zihlangabezane nazo ekhaya
nasemphakathini. Isibonelo, amagama ezikole izingane ezingakaze zizwe ngawo,
njengesikole iNgwemabala, ishizolo, eNgwavuma, ngamagama ababewafunda
ngokuwaphindaphinda. Kanjalo ukuhamba ngezinyawo izinyanga ezintathu uyobona
umuntu omthandayo ezweni elikude, ukulala ngesiphuku, okuyinto engeke yatholakala
kalula emiphakathini yesimanje, ukulala esikhotheni eduze kwendlela ngenxa
yokukhathala, okungamanye amagama ayechazwa nguthisha uNtombifuthi,
ayezoqhamuka endabeni ababezoyifunda, nokunye okuningi. Lokhu kuyaphikisana
nokushiwo nguVygotsky (1978) lapho ethi izingane kumele zifunde ukufunda ngezinto
ezenzeka emiphakathini, futhi ezinolwazi oluthile ngazo. UDuke benoMartin kuBlock
noParris (2008), bagcizelela bathi:
Elementory educators are travel agents responsible for helping students
understand the journey toward reading comprehension they are about to take
and helping them want to take it. Then, as throughout the journey, they serve
as tour guides, providing the dispositions, background knowledge, and ways
of thinking that that students need to become, we hope, increasingly
sophisticated comprehenders, confident travellers. So, indeed, elementary
288