isahluko 1 - UKZN ResearchSpace - University of KwaZulu-Natal

zokufunda okubhaliwe kumbe angaphezu kwelilodwa ngokuhlanganyela, okungabe
kungahambanga kahle.
Ngamanye amazwi kusho ukuthi kungaba ukuthi umntwana kukhona elinye lala
makhono angalizuzanga ngokwanele (McGuinness, 2004, p. 212). Ngokunjalo futhi,
ukufunda ngokuqondisisa kunomthelela nasekufundeni lana amanye amakhono amane.
Lokhu kungachaza ukuthi lapho othisha kungathiwa abachaze bona ngokwabo ukuthi
kuyini ukufunda, bangakuchaza njengokuthi kulapho umfundi akha umqondo
ngombhalo awufundayo elekelelwa nawulwazi avele enalo, asake waluthola
phambilini, kanye nasake ahlangabezana nakho empilweni (Pardo, 2004, p. 272).
Ngenxa yalokhu, kuyacaca ukuthi ukukwazi ukufunda okubhaliwe ngendlela eyiyo
yiwona mgogodla ekuphumeleleni komfundi endleleni yakhe eya emfundweni
ephakeme nasempumelelweni yakusasa. Ngamanye amazwi ukukwazi ukufunda
okubhaliwe yikhona okuyisango lawo wonke umuntu ofundayo noya empumelelweni
(Pandor, 2005; Machet & Pretorius, 2004; Cheng, 2003; Zimmermann & Hutchins,
2003; Mokatsi, 2005; Grabe, 2002). Bonke laba bacwaningi bavumelana ngazwi linye
lokuthi ukufunda okubhaliwe yikhona okuvulela yonke iminyango yempilo. Bakusho
lokhu ngoba ukuze ukwazi ukufunda (to learn) iZibalo, iSayensi, ezoMlando,
ubuNjiniyela, ubuKhenikha, njalonjalo, kuncike ekutheni ukwazi ukufunda okubhaliwe
futhi okufundayo ukuqonde (Zimmermann & Hutchins, 2003, p. 4).
4.10 UBUDLELWANE PHAKATHI KOLWAZI LOKUFUNDA NOKUBHALA
KANYE NOKUFUNDA OKUBHALIWE (RELATIONSHIP BETWEEN
LITERACY AND READING)
Kusemqoka ukugcizelela ukuthi ukufunda okubhaliwe kubalulekile ekuthuthukiseni
ekukwazini ukufunda nokubhala, okuyinto esemqoka emfundweni yomntwana. Kanti
futhi ukufunda okubhaliwe okungahambisani nokubhala kungezwakala
njengensambatheka ngoba lokho umntwana akufundayo kusuke kubhalwe phansi.
Isibonelo, ingani yikho lokhu kufunda okubhaliwe ingane ezokudinga ukuze ikwazi
ukuphendula iphepha lemibuzo yokuhlolwa, kumele ibhale ephepheni lezimpendulo,
147