isahluko 1 - UKZN ResearchSpace - University of KwaZulu-Natal

Ngaphandle kolwazi abafundi abavele benalo lapho befunda okubhaliwe okusiza
ukuthuthuka kwabo ekufundeni okubhaliwe ngokuqondisisa, ucwaningo olwenziwa
kothisha baseMelika olwaluhlola ukuthi babenamaphi amakhono okufundisa ukufunda
okubhaliwe; othisha abangama-76 basezikoleni eziyi-15 zamabanga aphakeme babuzwa
ukuthi yiziphi izinto/izingxenye kumbe amakhono abacabanga ukuthi yiwona asemqoka
lapho uthisha efundisa ingane ukufunda okubhaliwe. Izimpendulo zaveza ukuthi othisha
babekholwa ukuthi ukufundiswa kwemibhalo/imibhalo yobuciko (literature) kanye
nokufunda ngokuqondisisa yizona zinto ezisemqoka okufanele uthisha agxile kuzo lapho
efundisa ukufunda okubhaliwe. Lokhu kusiza abantwana nangokuthi bakwazi ukufunda
ngehlo elihlolayo (USA Department of Education, 2006). Lezi zimpendulo zazingenele
ekuvezeni isithombe esicacile ngokuthi othisha bayaqonda kahle ukuthi kusho ukuthini
ukufundisa ingane ukufunda umbhalo. Lokhu kuyahambisana nokwatholakala kothisha
okwakucwaningwa ngabo kulolu cwaningo.
Ngale kwalokhu, ucwaningo olwenziwa nguWoolley ngonyaka wezi-2005 e-Australia
lukhomba ukuthi bangamaphesenti ayi-10 kuya kwangama-20 abafundi basezikoleni
zase-Australia abanezinkinga zokufunda okubhaliwe. Lolu cwaningo luveza ukuthi
nakuba zikhona izindlela zokufundisa ukufunda okubhaliwe ezithathwa njengezilusizo
futhi okuyizona ezilungileyo, kodwa iningi lwalezo zindlela othisha abazisebenzisi
emakilasini lapho befundisa ukufunda okubhaliwe. UWoolley ubika ukuthi
bangamaphesenti angama-30 kuphela abafundi eminyakeni wesi-3 nowesi-5 ezikoleni
(ibanga 3 nebanga 5) abehlulekayo ukufunda nokubhala ezikoleni zase-Australia.
NaseMelika, imiphumela efanayo yatholakala (Reid, 2003; Louden et al, 2000). Lokhu
kufakazela khona ukuthi nasemazweni athuthukile njengayo iMelika nako-Australia,
ikhona inkinga yamazinga aphansi okufunda okubhaliwe, njengoba naseNingizimu
Afrika kuseyinselelo enkulu ukuthuthukiswa kwamazinga okufunda okubhaliwe
kubafundi kuze kube manje.
Ngaphandle kwalolu cwaningo, lukhona nolwenziwa nguDroop benoVerhoeven (2003)
eNetherlands. Lolu cwaningo lwaluhlose ukuhlola izinga lomfundi lokufunda okubhaliwe
kanye namakhono anawo okufunda okubhaliwe kubantwana abasafufusa ekufundeni
50