isahluko 1 - UKZN ResearchSpace - University of KwaZulu-Natal

ukuze kuthi lapho esekhulile, kuthi noma efunda ngezinto ezintsha, abe esewazuzile
amakhono okukwenza lokhu, ngoba-ke ukubhala nokufunda khona ngokwakho, angeke
akuzuza ngokuphelele, njengawo wonke nje umuntu omdala ofunda aze afe. Lokhu-ke
kusho ukuthi umfundi osemncane uyamdinga uthisha ozomelekelela lapho efunda
okubhaliwe noma ebhala njengoba kungebe bikho ukufunda (learning) ngaphandle
kokufunda okubhaliwe (reading) kanye nokubhala.
I-Answers.com (2009) noFelini (2008, p. 21), bathi ulwazi lokubhala nokufunda yisimo
sokuba umuntu akwazi ukufunda nokubhala futhi kuhambisana negama lesiNtaliyana
elithi alfabetizzazione, elisho ukuthi okubhalwe ngezinhlamvu (marked with letters),
nelesiFrentshi elithi alphabetization, neleSipanishi elithi- alfabetizacion, nelesiJalimane
elithi- alphabetisierung. Eminyakeni edlule, umlando waleli gama elithi ‘literacy’
ngokwesiNgisi, lalingenayo le ncazelo, kodwa lalisho umuntu ojwayelene nemibhalo
yobuciko yesiNgisi (familiar with literature) noma kumbe lalingasho futhi ukuthi ofunde
kakhulu noma ofundile (well educated, learned). Kungeminyaka yonyakakhulu we-1900
lapho leli gama labe selishintsha incazelo yalo selisho ukukwazi ukufunda nokubhala
(ability to read and write). Nanamuhla basekhona abanye osozilimi abasenencazelo
eyehlukile kunalena, njengalabo abathi leli gama lisho ukukwazi ukuqonda ubhale futhi
indaba emfushane ngezigameko zemihla ngemihla (Felini, 2008, p. 21).
Kanjalo noFreire (1971) naye waqhamuka nencazelo eyehlukile yaleli gama lapho
ekhuluma ngokusetshenziswa kwalo emiphakathini kanye nangokwepolitiki. Lokhu
kwakungenxa yesimo sabantu abampofu baseBrazil uFreire ayehlala nabo, ebabona
begqilazekile behlushwa. UFreire wahlanganisa la magama: literacy, conscientization,
ne- liberation of the oppressed. Lokhu wayekwenza ukuze axhumane nabantu
ngokwemibhalo. Ngale ndlela abantu baba nolwazi lokufunda nokubhala,
okwakuzobasiza ukuba bathole izincazelo ngezinto ezazenzeka ngaleso sikhathi,
nanokuthi umuntu alazi iqhaza alibambile emphakathini (Felini, 2008, p. 22). UPettinelli
(2009) yena, yize akushoyo ngaleli gama elithi ‘literacy’ kungahlukile encazelweni ethi
ukukwazi ukufunda nokubhala, kodwa yena ubeka ngokuthi igama elithi ‘literacy’ alisho
126