isahluko 1 - UKZN ResearchSpace - University of KwaZulu-Natal

4.7.3 UKUFUNDA OKUSAFUFUSA (EMERGENT LITERACY)
Igama elithi ukufunda okusafufusa noma okufufusayo ‘emergent literacy’ lichaza
ukubamba kwengane ekufundeni ukufunda nokubhala (literacy acquisition) kanti futhi
kusho ukuthuthuka ekufundeni kwengane ukufunda nokubhala. Lokhu akusho khona
ukufunda kwengane ekufundeni okubhaliwe nokubhala kuphela, kodwa kuhlanganisa
izinto eziningi ezinomthelela ekutheni ingane ithuthuke ekufundeni ulimi, kanti futhi
izinto ingane ezibonayo, ehlangabezana nazo, nezenziwa ngabantu abadala, iyafunda
ngazo. Ngalesi sikhathi, ingane iqale ifunde ukukhuluma, ukulalela, bese iqala izifunela
yona ngokwayo ulwazi izame ukufunda okubhaliwe, ifunde futhi ibhale, noma ngabe
lokho kungangebe namqondo kangakanani kumuntu omdala kodwa yona isuke ithuthuka
ekufundeni okubhaliwe nasekubhaleni.
Ngakho-ke, njengoba sengike ngachaza phambilini, igama elithi ukufunda okusafufusa
linikeza isithombe sokuthi ingane iqala ukufunda ulimi kudala ngaphambi kokuba iye
esikoleni, ifunde ukufunda nokubhala, ngaphambi kokuba ingene esikoleni, njengoba
kungeyona into eqala lapho ingane ingena esikoleni, kunalokho kuqala masinyane ingane
izelwe futhi yinto eqhubeka njalo, engapheliyo, njengakho ukufunda okucathulayo.
Lokhu kusho ukuthi ingane ifunda kokukhulunywa nokwenziwa ngabantu abadala
abafana nothisha nabazali ekhaya (Zygouris-Coe, 2001, Stahl & Miller, 1989;
McKeough et al, 2006; Joubert et al, 2008; Pretorius, 2002, 2004).
Igama elithi ukufunda okusafufusa, lihlanganisa ukufunda, ukubhala, ukukhuluma,
ukulalela, ukubuka, kanye nokucabanga (Cooper, 1997). U-O’Leary (2005, p. 2) ubeka
ukuthi uthisha okholelwa ekufundeni okusafufusa uqinisekisa ukuthi abantwana bathola
kahle ulwazi lwemisindo nezimelamsindo futhi balalele kahle lapho abantu abadala
bekhuluma ngezihloko ezahlukahlukene ukuze babafake uthando lokufunda kuzwakale.
Uyehluka-ke kwabanye abacwaningi u-O’Leary uma ethi uthisha oyilolu hlobo uyaye
abone ukuthi akukho okufundwayo okungenzeka ngaphandle kwasekilasini (O’Leary,
2005, p. 2), ngoba abanye abacwaningi bayavumelana ngokuthi ukuthuthuka kwengane
ekufundeni okubhaliwe nasekubhaleni, akuqali ekilasini, kodwa kuqala ekhaya, futhi
131