isahluko 1 - UKZN ResearchSpace - University of KwaZulu-Natal

2.1 ISINGENISO
Esahlukweni esedlule ngikhulume ngesendlalelo salolu cwaningo, ngachaza ngokuyizona
zizathu ezingenze ngabona isidingo sokwenza lolu cwaningo. Ngixoxile ngocwaningo
nemibiko eyahlukene engifake ugqozi lokwenza ucwaningo lwalolu hlobo. Ngiphinde
ngaveza ukuthi ucwaningo lugxile ekufundisweni kokufunda okubhaliwe (reading)
olimini lwesiZulu njengolimi lwasekhaya emabangeni aphansi, okuyibanga lesibili
nelesithathu. Okunye okudingidiwe imibuzongqangi yocwaningo. Ngibuye ngathinta
nokuphathelene nempilo yami, okuyindlela engafunda ngayo kanye nezimo
ezazingizungezile ngesikhathi ngisesemabangeni aphansi, okungezinye zezinto
ezingifake ugqozi lokwenza lolu cwaningo. Kulesi sahluko kuzobuyekezwa imibhalo.
Lokhu kuzokwenzeka ngokuthi kubhekwe ucwaningo oluphathelene nokufunda
okubhaliwe oseluke lwenziwa eNingizimu Afrika kanye nasemazweni angaphandle.
Lokhu kuzokwenziwa ukuze kuvezwe isithombe esicacile ngesidingo salolu cwaningo.
Ngale kocwaningo oseluke lwenziwa maqondana nokufunda okubhaliwe, kuzobhekwa
izinjulalwazi zokufunda okubhaliwe, kanye nezindlela namasu okufundisa ukufunda
okubhaliwe. Okuyolandela lapho isigaba esiyoxoxa ngezinkolelo zothisha nokufundisa
okubhaliwe. Isahluko siyobe sesigcina ngesiphetho.
2.2 ISITHOMBE NGOCWANINGO OSELWENZIWE MAYELANA
NOKUFUNDA OKUBHALIWE: NGAPHANDLE NANGAPHAKATHI
KWASENINGIZIMU AFRIKA
Luningi ucwaningo oselwenziwe mayelana nokufunda umbhalo/okubhaliwe eNingizimu
Afrika nakwamanye amazwe (Pretorius & Mokhwesana, 2009; Pretorius & Machet,
2004, 2008; Pretorius & Mampuru, 2007; Pretorius, 2009; Callery, 2005; Pugh &
Taillefer, 1998, Balfour et al, 2001; Dreyer & Nel, 2003; Saumell et al, 1999,
Macdonald, 2002; Pretorius & Ribbens, 2005; Cheng, 2003; Lee, 1998; Yigiter, et al
2005; Duke, 2001; Dole, 2000; Duffy, 2002; Pearson, 2006; Pressley, 2006;Yang, 2004).
Nokho luyindlala kakhulu oseluke lwenziwa lubheka ukufundiswa kokufunda
40