isahluko 1 - UKZN ResearchSpace - University of KwaZulu-Natal

Ngenxa yalesi sizathu, lokhu kusho ukuthi uthisha akaboshiwe ukusebenzisa indlela
noma isu elifanayo kuzo zonke izingane zakhe, kodwa ingane nengane yiyona okumele
isizwe ngokwezidingo zayo. Ngamanye amazwi uthisha kulindeleke ukuba asebenzise
amasu okufundisa ahlukahlukene. Isibonelo, u-AD-Heisat, noMohammed,
noKrishnasamy kanye no-Assa (2009) benza ucwaningo ngokusetshenziswa kwamasu
okufundisa ekuthuthukiseni ukukwazi ukufunda okubhaliwe kothisha basezikoleni
zamabanga aphansi eMalaysia. Bathola ukuthi nanxa othisha babewazi amasu
ababengawasebenzisa okufundisa ukufunda ezinganeni ezicathulayo ekufundeni
umbhalo, babengawasebenzisi ngendlela okwakungalindeleka ukuba bawasebenzise
ngayo (AD-Heisat et al, 2009, p. 310).
Amanye amasu asetshenziswa ngothisha yilawo abawasebenzisa ngaphambi kokufundisa
isifundo leso (pre-reading strategies), amanye yilawo abawasebenzisa ngenkathi
ukufunda okubhaliwe kuqhubeka (during reading strategies), kanti amanye
bawasebenzisa emva kwesifundo (after reading strategies). Lokhu kuchaza ukuthi amasu
okufundisa ahlukaniswe izigaba ezintathu, kuye ngokuthi uthisha usekusiphi isigaba
sokufundisa. Izibonelo zamasu angasetshenziswa ngaphambi kokuqala ukufunda (prereading
strategies) yilezi: ukuxukuza ulwazi lwabantwana abavele benalo ngento ethile
(activating prior knowledge), brainstorming, nokubikezela okuzokwenzeka (prediction).
Kanti amasu asetshenziswa ngesikhathi ukufunda okubhaliwe kuqhubeka (during
reading) yilana: ukufingqa ngamazwi umbhalo, ukwakha imibuzo ukuqhathanisa
nokuhlola ukuthi bayalandela yini, ukuthola indikimba, i-visualizing, ukuzilungisa (self
correction).
Kanti amasu asetshenziswa emva kokwethulwa kwesifundo kubandakanya lana
alandelayo: ukufunda ngokulekelelana noma ngokwabelana (shared reading), ukubuza,
ukuqinisekisa obekucatshangiwe ukuthi kuzokwenzeka, ukubhala ama-assignments,
namanye amaningi. Kodwa-ke nakuba emaningi kangaka amasu okufundisa ukufunda,
lapha akuzukuxoxwa ngawo onke, kodwa kuzokhethwa ambalwa ahambisana nokufunda
okusafufusa. Endimeni elandelayo ngizoxoxa ngamasu ambalwa asetshenziswa
79