isahluko 1 - UKZN ResearchSpace - University of KwaZulu-Natal

umcwaningi aqonde kahle ukuthi othisha bathembela kuluphi ulwazi ekufundiseni
ukufunda umbhalo kula mabanga ayecwaningwa.
Ngamanye amazwi, ucwaningo lobunjalo botho lungathathwa njengesibuko noma
ifasitela esingakwazi ngalo ukubuka siphinde siphawule ngezinto eziphathelene nenhlalo
yabantu. Lezo zinto zingambandakanya imibuzo ephathelene nenjulalwazi ngokut hi
abantu abathile baphila kanjani, izikhungo ezithile zisebenza kanjani, nanezindlela noma
amaqembu abantu abathile ababuka ngayo noma abathatha ngayo izinto ezenzeka
ezimpilweni zabo (Cohen, Manion & Morrison, 2004). Ngale ndlela umcwaningi
wobunjalo botho ubheka ukwenza kwabacwaningwayo kanye neqhaza abalibambile
ngesikhathi socwaningo, akubuke lokhu akuhlanganise nolunye ulwazi aluqoqayo
mayelana nalolu cwaningo. Lokhu kungenxa yenkolelo yokuthi umcwaningi angebe nje
phakathi nendawo aziqhelelanise nolwazi nobufakazi abuthole ngenkathi eqoqa ulwazi
oludingwa ucwaningo (Mason, 2003).
UNieuwenhuis kuMaree (2008, p. 50) ugcizelela ukuthi ucwaningo lobunjalo botho
luzama ukuqoqa ulwazi olucebile, oluchaza kabanzi ngesimo noma ngento ethile noma
ngabantu abathile ngenhloso yokwakha isithombe salokho umcwaningi akucwaningayo.
Lokhu kwenza kube semqoka ukuthi umcwaningi wobunjalo botho akwazi ukuxoxisana
noma abuke abantu labo acwaninga ngabo benza abakwenzayo ngendlela abajwayele
ukwenza ngayo kuleyo ndawo abakuyo, aphinde ahlaziye ulwazi olutholakele
ocwaningweni, akhe izindikimba ngakutholayo (Nieuwenhuis, 2008; Terreblanche,
Durrheim & Painter, 2006). Yingakho nje oLeedy beno-Ormrod (2005, p. 134)
bephawula ukuthi ucwaningo lobunjalo botho lungakwazi ukuveza ukuthi isimo noma
isikhungo esithile siluhlobo luni. Ngale ndlela umcwaningi uyakwazi ukuthola ulwazi
olusha abengalwazi ngento, ngabantu, noma ngesimo esithile, akwazi nokuthola
izinkinga eziphathelene nabo/nakho.
Ngokunjalo oKaplan benoMaxwell (1994) bavumelana ngokuthi injongo yokuqonda
kahle ngezimvo noma indlela abantu abacwaningwayo ababuka ngayo izinto kanye
nalezo zindawo abakuzo kuye kuphelelwe ubumqoka lapho kwenziwa ucwaningo
lobungako botho (quantitative research). Kusemqoka ukwazi ukuthi ucwaningo
90