Radio is dead-Long live the Radio.pdf - Universidad del País Vasco

5. Metodologia
The Radio is dead. Long live the Radio!
Hizkuntza gutxituak eta identitateak: irrati kazetarien perfilak...
Komunikazio honetan aurkeztuko diren emaitzak, metodologia kualitatiboaren barnean
kokatzen diren sakoneko elkarrizketak aplikatuz lortu dira. Ikuspegi metodologiko
honek ahozko testigantzak jaso eta irratigile euskaldun eta gaelikoen lan-ohitura
eta gaitasunen inguruko iturri argitaragabeak sortzea ahalbidetu digu. Nolanahi
ere, ahozkoez gain, artxiboetan eta idatzizko iturrietan topatutako datuak ere erabili
ditugu. Bestalde, Radio nan Gaidheal eta Euskadi Irratiko erredakzioetan eta irratsaio
batzuetan burututako behaketa bideratzeko, etnografian oinarritutako metodoak
aplikatu ditugu (Murchison, 2010). Esan beharra dago in situ gauzatutako behaketa
aldiak, erabateko garrantzia izan dutela hasiera batean finkatutako helburuak lortzeko
eta elkarrizketetarako galdetegi aproposak diseinatzeko garaian.
Kazetarien txantiloi gisa, metodologia kuantitatiboen patroietatik ihes eginez
unibertso murritzago baina ezaugarri bereizleak zituena aukeratu dugu. Elkarrizketatutako
profesionalak, 22 guztira, hedabidean igarotako denboraren eta karguaren
arabera hautatu dira.
6. Berezitasun eta antzekotasunak ezartzeko irizpideak
Hedabideak eta kazetaritza mota desberdinak konparatzen dituzten ikerketek gora
egin dute nabarmenki azkeneko urteetan (Zabaleta, 2010), nahiz eta oraindik beraien
baliotasuna eztabaidan jartzen den maiz esanez ikerketok mendebaldeko pentsaerara
norabidetuta daudela (Josephi, 2009). Berriki, hizkuntza gutxituetako hedabideen
eta hauek gobernuen politika linguistikoekin duten harremanaren inguruko analisi
konparatiboak ere argitaratu dira (Kelly-Holmes, Moriarty, Pietikainen, 2009).
Azterketa honetan hizkuntza gutxituak erabiltzen dituzten bi irratitan lan egiten
duten kazetarien arteko konparaketak bideratu nahi izan ditugu, eta horretarako, sei
irizpide hartu dira kontutan. Lehendabizi, erredakzio bakoitzean bizikidetzan dauden
belaunaldi desberdinei erreparatu diegu. Hizkuntzak eta identitateak gizarte baten
ikur biziak direla onartuta, interesgarritzat hartzen dugu kultura berdinaren baina,
aldi berean, garai historiko desberdinen partaide diren profesionalen pentsaerak
batzea. Elementu konparatibo honek, kazetariek beste irizpide batzuez eta beraien
buruaz duten kontzeptua zein den arakatzeko bideak erraztu dizkigu. Irrati bakoitzaren
lantaldearen esperientzia profesionala dugu eztabaida eta konparaketarako beste
puntu bat. Azalean bestelako garrantzirik ez duen elementua iruditu arren, berebiziko
garrantzia duen gaia da gure ikerketa kasuetan; izan ere, aztertutako hizkuntza
komunitateetan unibertsitate mailako ikasketak ez ziren 80 eta 90. hamarkadara
arte garatu, eta beraz, irratian hasitako hasitako eta oraindik bertan dauden kazetari
349